Germanııa kantsleri qylmyskerlerdi Aýǵanstannan deportatsııalaýdy qoldady
ASTANA. KAZINFORM – Beısenbi kúni Germanııa kantsleri Olaf Sholts parlamenttiń tómengi palatasy Býndestagta ulttyq qaýipsizdik máselelerine qatysty málimdeme jasady.
O.Sholts ótken aptada 25 jastaǵy Aýǵanstan azamaty tórt jerden pyshaqtaǵan 29 jastaǵy polıtseıdiń ólimine qatysty pikir bildirdi. Úkimet basshysy qaıǵyly oqıǵa «barlyq Germanııa halqynyń júregine jetkenin» aıtty.
«Radıkaldy ıslam men terrorızm bizden erkindigimizdi tartyp almaq. Onsyz bizde demokratııa bolmaıdy», - dedi úkimet basshysy.
Qaza tapqan ofıtserdiń otbasyna, dostaryna jáne eń aldymen áriptesterine sóılegen sózinde O.Sholts: «Biz sizdi qoldaımyz. Biz polıtsııamyzdy qoldaımyz», - dedi.
Onyń aıtýynsha, Germanııadaǵy mundaı zorlyq-zombylyqqa qarsy zańdardy kúsheıtý jáne polıtsııa qyzmetkerlerin óltirgender tolyqtaı qatań jazalanýy tıis.
Depýtattarǵa arnalǵan baıandamada nemis qoǵamyndaǵy demokratııaǵa qarsy betalystar, sonyń ishinde solshyl jáne ońshyl saıasatkerlerge shabýyldardyń kóbeıýi de belgilendi.
O.Sholts qylmys jasaǵan adamdardy elden shyǵarý kerektigin aıtty. Ol Germanııanyń Aýǵanstan men Sırııa sııaqty elderge deportatsııasyn qaıta bastaý máselesi qyzý talqylanyp jatqanyn aıtty.
