Germanııa kantsleri Frıdrıh Merts ushaq basqarý quqyǵynan aıyryldy
ASTANA. KAZINFORM — Germanııa kantsleri Frıdrıh Merts ushý tájirıbesiniń jetkiliksizdigine baılanysty ushaqty óz betinshe basqarý quqyǵynan ýaqytsha aıyryldy. Sondaı-aq ol jeke menshigindegi eki qozǵaltqyshty Diamond DA62 ushaǵyn satyp jibergen. Bul týraly Die Welt basylymy Bild jáne Kölner Stadt-Anzeiger basylymdaryna silteme jasap habarlady.
Avıatsııa uzaq jyldar boıy Frıdrıh Mertstiń basty áýestikteriniń biri bolǵan. Ol ushqysh kýáligin 2009 jyly alǵan.
— Ushaqty basqarý bala kezimdegi armanym edi. Bulttardyń arasynan kóterilip, kógildir aspandy kórý jáne qozǵaltqyshtardyń birqalypty jumys istegenin estý maǵan erekshe lázzat syılaıdy, – degen edi ol 2022 jyly Bunte jýrnalyna bergen suhbatynda.
Germanııa kantsleri qyzmetine kirispes buryn, 2024 jyly Merts Rostok qalasynyń mańyndaǵy Laage áýe bazasyna baryp, Eurofighter joıǵysh ushaǵymen ekinshi ushqysh retinde áýege kóterilgen. Bir saǵatqa sozylǵan ushý kezinde ushaq dybys jyldamdyǵynan asyp, shamamen 1,3 Mah jyldamdyqpen qozǵalǵan. Qonǵannan keıin saıasatker bul tájirıbeni «tamasha oqıǵa» dep baǵalaǵan.
Alaıda úkimet basshysy qyzmetine kiriskennen keıin onyń avıatsııaǵa ýaqyt bólýge múmkindigi azaıǵan. 14 qarashada Frıdrıh Merts Shlezvıg-Golshteınde ótken Hrıstıan-demokratııalyq odaq (HDS) partııasynyń sezine charterlik ushaqpen barǵan. Buqaralyq aqparat quraldarynda taraǵan habarlarǵa qaramastan, ushaqty kantslerdiń ózi emes, áýe tasymaldaýshy kompanııanyń kásibı ushqyshy basqarǵan.
Bild málimetinshe, ushaqty óz betinshe basqarý quqyǵyn saqtaý úshin ushqyshtar ushý tájirıbesin turaqty túrde rastap otyrýy kerek. Ol úshin jyl saıyn keminde 12 saǵat ushý nemese 12 ret áýege kóterilip, qoný qajet. Sondaı-aq nusqaýshymen birge bir saǵattyq oqý-jattyǵý reısin oryndaýǵa bolady.
Tyǵyz jumys kestesine baılanysty Merts bul talaptardy oryndaı almaǵan. Sonyń saldarynan ol ushaqty óz betinshe basqarý quqyǵynan ýaqytsha aıyrylǵan.
Sonymen qatar kantslerdiń negizgi ushqysh kýáligi áli de jaramdy. Bolashaqta avıatsııaǵa qaıta ýaqyt bólýge múmkindik týsa, ol qajetti talaptardy oryndap, ushaqty jeke basqarý quqyǵyn qalpyna keltire alady.
Eske sala keteıik, Toqaev Kantsler Frıdrıh Mertsti elimizge memlekettik saparmen kelýge shaqyrǵan bolatyn.