Germanııa, Kanada jáne AQSh halyqaralyq hakerler jelisin joıdy
ASTANA. KAZINFORM — Germanııa, AQSh jáne Kanada kıberqylmysqa qarsy mamandary ınternettegi iri shabýyldardy uıymdastyrdy degen kúdikke ilingen álemdegi eń iri eki botnet — Aisuru jáne Kimwolf jelilerin japty, dep habarlaıdy Euronews.
Halyqaralyq operatsııa nátıjesinde álemdegi eń iri eki bot jelisi tolyqtaı isten shyǵaryldy.
Operatsııanyń aıaqtalǵany týraly bılik juma kúni habarlady. Oǵan Germanııa, AQSh jáne Kanada elderiniń kıberqylmysqa qarsy kúres mamandary qatysty. Birlesken áreketterdiń arqasynda tergeý derekteri boıynsha ınternettegi iri shabýyldar serııasyna qatysy bar Aisuru jáne Kimwolf jelileriniń qyzmeti toqtatyldy.
Nemis polıtsııasy, prokýratýra jáne kıberqylmysqa qarsy bólimsheler ókilderi bul jeliler aýqymy men shabýyl jasaý múmkindigine baılanysty ІT-ınfraqurylymǵa «eleýli qaýip tóndirgenin» málimdedi.
Botnet degenimiz — zııandy baǵdarlamamen juqtyrylǵan kompıýterler nemese basqa da qosylǵan qurylǵylardan quralǵan jáne operator tarapynan jasyryn basqarylatyn jeli.
Mundaı jeliler kıbershabýyl jasaý, derekterdi urlaý, bopsalaý jáne ózge de qylmystyq áreketter úshin qoldanylady. Kóp jaǵdaıda qurylǵy ıeleri óz tehnıkalarynyń qylmystyq ınfraqurylymnyń bir bóligine aınalǵanyn bilmeıdi.
Tergeý málimetinshe, Aisuru botneti birneshe mıllıon buzylǵan qurylǵyny qamtyǵan — úıdegi marshrýtızatorlardan bastap veb-kameralarǵa deıin. Al Aisuru-men baılanysty Kimwolf jelisi negizinen vırýs juqqan Android TV qurylǵylarynan turǵan. Eki jeliniń de aýqymy mıllıondaǵan qurylǵyǵa jetip, olardy álemdegi eń qýatty kıbershabýyl quraldarynyń birine aınaldyrǵan.
Tergeý barysynda botnetterdiń «qyzmet kórsetýden bas tartý» (DDoS) túrindegi taratylǵan shabýyl jasaý úshin paıdalanylǵany anyqtaldy. Mundaı shabýyl kezinde qaskóıler belgili bir nysanǵa orasan kóp trafık jiberip, ony shamadan tys júktep, isten shyǵarady. Operatsııaǵa qatysqan AQSh Ádilet mınıstrligi Aisuru men Kimwolf «rekordtyq shabýyl» jasaǵanyn, sonyń saldarynan álem boıynsha túrli servıster men kompanııalardyń jumysy buzylǵanyn málimdedi.
Vırýs qonǵan qurylǵylar is júzinde qylmyskerlerdiń quralyna aınalǵan: botnet operatorlary olarǵa qoljetimdilikti basqa kıberqylmyskerlerge satyp otyrǵan. Bul tapsyryspen shabýyl uıymdastyrýǵa jáne naqty oryndaýshylardy jasyrýǵa múmkindik bergen.
AQSh bıliginiń derekterine sáıkes, zardap shekkender jıi bopsalaýǵa ushyraǵan. Keı jaǵdaılarda keltirilgen shyǵyn ondaǵan myń dollarǵa jetken.
Germanııa men Kanada quqyq qorǵaý organdary botnetterdi basqarǵan eki kúdiktini anyqtaǵan.
Olardyń aty-jóni jarııa etilmegenimen, bılik olarǵa qatań zańdyq jaýapkershilik qarastyrylatynyn málimdedi. Tergeý jalǵasyp jatyr, ári bul jelilerdi basqarýǵa basqa da tulǵalardyń qatysy bolýy múmkin ekeni joqqa shyǵarylmaıdy.
Sarapshylardyń pikirinshe, Aisuru men Kimwolf-tyń joıylýy sońǵy jyldardaǵy kıberqylmysqa qarsy kúrestegi halyqaralyq qaýymdastyqtyń eń iri jetistikteriniń biri boldy. Bul jelilerdiń aýqymy men mańyzdy ınfraqurylymdarǵa zııan keltirý múmkindigi memleketter, bıznes jáne jeke paıdalanýshylar úshin úlken qaýip tóndirgen.
Atalǵan operatsııa kıberqylmyspen kúreste shekaraǵa baǵynbaıtyn qaýipterge qarsy halyqaralyq yntymaqtastyqtyń sheshýshi ról atqaratynyn taǵy bir ret kórsetti.
Aıta ketelik hakerler Instagram-nyń 17,5 mıllıon qoldanýshysynyń derekterin urlaǵan edi.
