Germanııa qalalarynda ońshyl ekstremızmge qarsy sherýler jalǵasyp jatyr

ASTANA. KAZINFORM - Búgin Germanııanyń birqatar qalasynda ásire ońshyl partııalardyń qyzmetine qarsy kezekti mıtıngiler ótti. Bul týraly Apnews.com jazdy. 

Rostok, Ittseho jáne Gota qalalarynda myńdaǵan demonstratsııalar boldy. Eń iri mıtıngiler Germanııanyń soltústiginde – Meklenbýrg-Pomeranııa jáne Shlezvıg-Golshteınde tirkeldi. 

Polıtsııanyń málimetinshe, Itzehode 4 myńǵa jýyq adam narazylyq aktsııasyna shyqqan. Rostokta 3,2 myń adam jınaldy. 

Bul narazylyqtarǵa 2023 jyldyń qarasha aıynda Potsdamdaǵy radıkaldy ońshyl saıasatkerlerdiń kezdesýi sebep boldy. Onda saıasatkerler remıgratsııa máselesin qozǵaǵan. Oǵan sáıkes Germanııada turatyn sheteldik azamattardyń kóp bóligi elden ketýi kerek.

Bul usynys nemis qoǵamynda úlken rezonans týdyryp, eldegi mıtıngiler tolqynyna ulasty.