Germanııa Iranmen soǵysqa aralasqysy kelmeıdi — Merts

ASTANA. KAZINFORM - Germanııa kantsleri Frıdrıh Merts Norvegııaǵa sapary barysynda Berlınniń Ormýz buǵazy arqyly ótetin kemelerdi áskerı turǵydan qorǵaý máselesin qarastyrýǵa negiz joq ekenin málimdedi. Buǵan deıin Iran tarapynan atalǵan buǵazǵa shabýyldar jasalǵan bolatyn. Bul týraly Reuters agenttigi habarlady, dep jazady Armenpress.

- Germanııanyń bul soǵysqa qatysy joq jáne biz oǵan aralasqymyz kelmeıdi, — dedi ol.

Sondaı-aq Germanııa kantsleri AQSh prezıdenti Donald Tramp ákimshiliginiń reseılik munaı tıelgen kemelerge qatysty sanktsııalardy ýaqytsha jeńildetý sheshimin synǵa aldy.

-Biz muny durys sheshim dep sanamaımyz. Qazir másele munaı jetkiziliminde emes, baǵada bolyp otyr. Osyǵan baılanysty AQSh úkimetin mundaı qadamǵa ıtermelegen basqa qandaı faktorlar bolǵanyn bilgim keledi, — dedi Merts.

Iranǵa qarsy soǵys jaǵdaıynda munaı men gaz baǵasyn tómendetýge baǵyttalǵan AQSh pen Izraıldiń áreketteri aıtarlyqtaı nátıje bermegenge uqsaıdy. Óıtkeni 13 naýryzda Brent markaly munaıdyń baǵasy qaıtadan barreline 101 dollarǵa deıin kóterildi.

12 naýryzda AQSh teńiz arqyly jetkiziletin reseılik munaı men munaı ónimderin satyp alýǵa qatysty sanktsııalar aıasynda birqatar elge 30 kúndik jeńildik kezeńin bergen bolatyn.

Osyǵan deıin Tramptyń reseılik munaıǵa salynǵan sanktsııalardy ýaqytsha jeńildetkeni týraly jazdyq.