Germanııa halqynyń tórtten bir bóligi - shetten kóship kelgender
BRıÝSSELЬ. QazAqparat - Germanııada basqa memleketterden qonys aýdarǵan halyqtyń sany 19,3 mıllıonǵa jetti, bul - eldegi búkil halyqtyń 23,6 paıyzy, dep habarlaıdy QazAqparattyń menshikti tilshisi.
Mundaı málimetti GFR federaldy statıstıkalyq bıýrosy taratty.
«2017 jyly Germanııada turatyn 19,3 mıllıonǵa jýyq adamnyń shetten kelgeni nemese bir kezderi kóship kelgenderdiń urpaǵy ekeni anyqtaldy, bul ótken jylmen salystyrǵanda 4,4 paıyzǵa kóp», - dep atap ótti vedomstvodaǵylar.
Nemis statısteriniń aıtýynsha, belgili bir adam nemese onyń ata-anasynyń bireýi bolsa da, Germanııa azamattyǵymen týylmaǵan bolsa, ol «shetten kóship kelgender» qataryna jatady. Degenmen, osy atalǵan halyqtyń 51 paıyzy osy ýaqytqa deıin Germanııanyń tólqujatyn alyp úlgergen.
«Shetten kelgender» tobyna jatatyn jalpy halyqtyń 2,8 mıllıonynyń ata tegi - túrik, 2,1 mıllıon adamnyń ata tegi - polıaktar. Reseıden 1,4 mln adam kóship kelse, Qazaqstannan qonys aýdarǵan halyqtyń sany - 1,2 mıllıon.
