Germanııa halqy koronavırýs 2021 jyly da taraýy múmkin dep úreılenip otyr
BERLIN. DW.COM-QazAqparat – GFR azamattarynyń basym bóligi jańa koronavırýs indetiniń taraýy 2021 jyly da jalǵasýy múmkin dep alańdap otyr.
Bul týraly QazAqparat dw.com saıtyna silteme jasap habarlaıdy.
«Ergo» saqtandyrý kompanııasynyń qoǵam pikirin zerdeleý maqsatynda júrgizgen saýalnamaǵa qatysýshylardyń 60 paıyzy indettiń kelesi jyly da taraıtyndyǵyna alańdaýshylyq bildirip otyr. Saýalnamaǵa qatysýshylardyń tek 18 paıyzy ǵana úreılenýge esh negiz joq dep esepteıdi.
Eń qyzyǵy, indettiń taraýy jalǵasýy múmkin degen boljam negizinen 18-30 jas aralyǵyndaǵy azamattardy (70 paıyz) qatty alańdatatyn kórinedi. Mundaı boljamǵa 31 men 40 jas aralyǵyndaǵy azamattar asa sene bermeıdi. Degenmen munda da kórsetkish 54 paıyzdy qurap otyr.
Ózderin jańa vırýstan eń kóp zardap shegýi múmkin táýekel tobyna jatqyzatyndar sany saýalnamaǵa qatysýshylardyń 41 paıyzyn qurap otyr. 30-jasqa deıin jastar arasynda bul kórsetkish 11 paıyz bolsa, 60 jastan asqandar arasynda 75 paıyzdy qurap otyr.
