Germanııa, Grekııa men Ispanııada orman órtenip, turǵyndar evakýtsııalanyp jatyr
BERLIN. QazAqparat – Birqatar Eýropa elderinde orman órtine baılanysty adamdar evakýtsııalanyp jatyr, dep habarlaıdy QazAqparat Deutsche Welle-ge silteme jasap.
Joǵary temperatýra men qatty jel Berlınnen 70 km jerde orman órtiniń shyǵýyna sebep boldy. Germanııadaǵy temperatýra 38 gradýstan asty. Jumadan beri jalǵasyp kele jatqan órt úılerge taıap qalǵandyqtan, 20-ǵa jýyq aýyldyń turǵyndaryna evakýatsııalanýǵa buıryq berildi. Jalyn sharpyǵan aýmaq shamamen 100-110 gektardy qurady.
Jeksenbide Grekııadaǵy ekinshi úlken aral Evııanyń ortalyq bóliginde baqylanbaıtyn orman órti anyqtaldy. Qatty jel soǵyp, jalyn Gaıadaǵy taýly ormannyń baýraıyna jaıyldy. Jalyn keıbir úılerge 800 metrge deıin jaqyndaǵandyqtan, bılik saqtyq sharasy retinde Kremastos aýylyn evakýatsııalaýdy buıyrdy.
Ispanııadaǵy órt sóndirýshiler aptap ystyqtyń saldarynan birneshe kún boıy órship turǵan orman órtterin sóndirýge tyrysty. Termometr baǵandary 40 gradýstan joǵary kóterildi. Eń kóp shyǵyn soltústik-batystaǵy Samora provıntsııasyna tıdi, onda 25 000 gektardan astam jer janyp ketken.
Orman órtteri Katalonııanyń soltústik-shyǵysynyń úsh bóliginde, Lerıda jáne Tarragona provıntsııalarynda jáne Barselonanyń ońtústigindegi Garraf aýdanynyń tabıǵı saıabaǵynda da boldy.
