Germanııa Gaza sektoryna áýeden gýmanıtarlyq kómek tastaı bastady
ASTANA. KAZINFORM — Germanııa birge Gaza sektoryndaǵy gýmanıtarlyq áýe kópirine Frantsııa men Ispanııa da qosyldy. Italııa da osyndaı qadamǵa barýdy ári Gaza sektoryndaǵy balalardy emdeý maqsatynda evakýatsııalaýdy bastaýdy josparlap otyr, dep habarlaıdy DW agenttigi.
Nemis áskerı-áýe kúshteri 1 tamyz, juma kúni, urys júrip jatqan Gaza sektoryna áýe arqyly gýmanıtarlyq kómek jetkizýdi bastady. Býndesverdiń kólik ushaǵy palestın aýmaǵyna shamamen 14 tonna azyq-túlik pen dári-dármekten turatyn 34 pallet tastady, dep sol kúni dpa agenttigi Germanııa Qorǵanys mınıstrligine silteme jasap habarlady.
Germanııa kantsleri Frıdrıh Merts bul jetkizýlerdi — GFR tarapynan jasalyp jatqan áreketti — Gaza sektoryndaǵy aýqymdy gýmanıtarlyq daǵdarys aıasynda «shaǵyn» kúsh dep atady. Degenmen, ol muny «mańyzdy belgi» dep baǵalady. «Biz osyndamyz, osy óńirdemiz, biz kómektesemiz», — dedi Germanııa úkimetiniń basshysy.
Bul operatsııaǵa Eýropanyń basqa elderi de qatysyp jatyr
1 tamyzda alǵashqy gýmanıtarlyq júkti Gaza sektoryna Frantsııa da tastady — bul týraly el prezıdenti Emmanıýel Makron X áleýmettik jelisinde jazyp, beınejazba tirkedi. Ol operatsııaǵa kómektesken nemis, ıordanııalyq jáne ámirliktik seriktesterine alǵysyn bildirip, Izraıldi palestın aýmaǵyna «tolyq gýmanıtarlyq qoljetimdilikti» qamtamasyz etýge shaqyrdy, asharshylyqtyń aldyn alý úshin.
Frantsııanyń Syrtqy ister jáne Qorǵanys mınıstrlikteri jaqyn kúnderi Gaza sektoryna birneshe tonna azyq-túlik jiberiletinin málimdedi.
Ispanııa da 1 tamyzda Gaza sektoryna 12 tonna gýmanıtarlyq kómek tastaǵanyn habarlady. Italııa 9 tamyzdan bastap gýmanıtarlyq áýe kópirine qosylmaqshy, dep málimdedi eldiń Syrtqy ister mınıstri Antonıo Taıanı. Ol sonymen qatar, Rımde Gaza sektorynan balalardy emdelýge evakýatsııalaýdy da bastaý josparlanǵanyn aıtty.
Áýe kópiri birneshe kún buryn iske qosylǵan
27 shildeden bastap Iordanııa men Birikken Arab Ámirlikteri Gaza sektoryna ushaqtar arqyly gýmanıtarlyq kómek tastaı bastady. Áýe kópiri Izraıldiń halyqaralyq qysymǵa ushyrap, kelisim berýinen keıin iske qosyldy. Buǵan qosa, 27 shildeden bastap Izraıl Gaza sektoryna BUU agenttikteri men basqa da halyqaralyq uıymdardan gýmanıtarlyq kómek tıelgen shamamen 200 júk kóligin ótkizýge ruqsat berdi.
Sońǵy málimetterge saı, Gaza sektoryndaǵy qurbandar sany 60 myńnan asyp ketti.
Al Frantsııa Gaza sektorynan bosqyndardy qabyldaý baǵdarlamasyn ýaqytsha toqtatty.