Germanııa Gaza halqyna qosymsha 5 mln eýro gýmanıtarlyq kómek bóledi
BERLIN. KAZINFORM — Germanııa syrtqy ister mınıstri Iohann Vadefýl Izraılge sapary barysynda Germanııa ashtyqqa ushyraǵan Gaza sektory turǵyndaryna kómek aıasyn keńeıtip jatqanyn málimdedi. Bul týraly TASS habarlady.
Mınıstrdiń aıtýynsha, Germanııa BUU-nyń Dúnıejúzilik azyq-túlik baǵdarlamasyna (WFP) qosymsha 5 mıllıon eýro bóledi.
— Biz Gaza sektoryndaǵy Dúnıejúzilik azyq-túlik baǵdarlamasyn qoldaý úshin qosymsha 5 mln eýro bólemiz. Bul, óz kezeginde, naýbaıhanalar men qoǵamdyq tamaqtaný pýnktterin qoldaýǵa kómektesip, orta merzimdi perspektıvada Gazanyń turǵyndaryn nanmen jáne ystyq tamaqpen qamtamasyz etýge múmkindik beredi. Gaza sektoryndaǵy gýmanıtarlyq apat dereý toqtatylýy tıis, — dedi Vadefýl.
Sonymen qatar, Germanııanyń syrtqy ister mınıstri Izraıl úkimetin BUU jáne onyń qurylymdarymen tyǵyz yntymaqtastyqty múmkindiginshe tez arada qaıta bastaýǵa shaqyrdy.
Vadefýl gýmanıtarlyq kómektiń bir bóligi HAMAS qozǵalysynyń qolyna túsýi múmkin ekenin joqqa shyǵarmady.
— Gaza sektoryndaǵy gýmanıtarlyq daǵdarys sonshalyqty aýqymdy, bul jaǵdaıda qosymsha kedergiler jasaý orynsyz. Teris paıdalanýdyń aldyn alýdyń eń tıimdi joly — sektorǵa múmkindiginshe kóp azyq-túlik pen gýmanıtarlyq kómek jetkizý, — dedi.
Germanııa SІM dereginshe, 2023 jyldyń qazan aıynda Gazada soǵys bastalǵaly beri Germanııanyń Palestına aýmaqtaryna bólgen gýmanıtarlyq kómegi 330 mıllıon eýrodan asty. Onyń 95%-dan astamy Gaza sektory halqyn qoldaýǵa jumsalǵan.
Aıta keteıik, 2025 jyldyń 2 naýryzynan bastap halyqaralyq gýmanıtarlyq uıymdar men BUU qurylymdary Gaza sektoryna kómek jetkize almaı otyr.
2025 jyldyń mamyr aıynda Izraıl AQSh-tyń qoldaýymen dástúrli gýmanıtarlyq kómek úlestirý júıesiniń ornyna jańa shema engizdi. Ol boıynsha, kómekti taratý jáne qajetti taýarlardy jetkizý boıynsha is júzinde monopolııalyq quqyq Gaza gýmanıtarlyq kómek qoryna berilgen. Bul bastama halyqaralyq uıymdar tarapynan synǵa ushyrady.
Sarapshylardyń pikirinshe, kómek taratý ortalyqtarynyń urys júrip jatqan aýmaqtardan tys Gazanyń ońtústigindegi «qaýipsiz aımaqtarda» ornalasýy anklav turǵyndaryn májbúrli kóshirýge alyp kelýi múmkin.
Aıta ketelik Izraıl Gaza sektoryna gýmanıtarlyq kómekti jetkizýdi jedeldetýge ýáde bergen edi.