Germanııa - Eýropadaǵy otyn baǵasy eń qymbat eldiń biri
BRıÝSSELЬ. QazAqparat – Germanııa Federaldy statıstıkalyq basqarmasynyń málimeti boıynsha, eldegi otyn quny Eýropadaǵy eń qymbat baǵalardyń biri sanalady, dep habarlaıdy QazAqparattyń menshikti tilshisi.
4 sáýirdegi jaǵdaı boıynsha, Germanııada dızel otynynyń lıtri - 2,06 eýroǵa baǵalanǵan. Bul - «super E5» markaly benzınniń baǵasyna teń.
Germanııa - EO-ǵa múshe elderdiń ishinde dızeldik otyn quny eń qymbat úshinshi memleket bolyp otyr. Odan joǵary baǵany tek Fınlıandııa men Shvetsııadan ǵana kezdestirýge bolady.
Germanııamen kórshiles basqa elderde dızel otyny arzanyraq. Mysaly, Lıýksembýrgte - 1,76 eýro, Avstrııada – 1,84, Frantsııada – 1,89 eýro. Al, Eýroodaqtaǵy dızel otynynyń eń tómengi baǵasy Maltada. Onda bul otyn 1,21 eýro tursa, Majarstanda – lıtrin 1,42 eýroǵa quıýǵa bolady.
Aıta keteıik, QR Energetıka mınıstri Bolat Aqsholaqov málim etkendeı, kóktemgi egis jumystaryn júrgizý úshin aýyl sharýashylyǵy taýaryn óndirýshilerge dızel otyny arzandatylǵan baǵamen bólindi.
