Germanııa, EO jáne Túrkııa Aýstralııadaǵy terrorıstik shabýyldy aıyptady

ASTANA. KAZINFORM — Sıdneıdegi jaǵajaıda bolǵan qarýly shabýyl saldarynan 12 adam qaza tapty. Oqıǵaǵa baılanysty birqatar eldiń bılik ókilderi pikir bildirdi, dep habarlaıdy DW.

Germanııa kantsleri Frıdrıh Mertstiń aıtýynsha, bul — «bizdiń ortaq qundylyqtarymyzǵa jasalǵan shabýyl».

— Antısemıtızmge Germanııada da, búkil álemde de núkte qoıýymyz kerek, — dedi ol.

Sıdneıdegi shabýyldy Germanııa men Eýropanyń ózge de saıasatkerleri qatań aıyptady.

— Evreı qaýymdastyǵyna qarsy jasalǵan bul sumdyq zorlyq-zombylyq áreketi sózsiz aıyptalýy tıis. Meniń oıym men tilegim zardap shekken adamdarmen, olardyń otbasylarymen jáne oqıǵa kezinde erlik kórsetken alǵashqy kómek qyzmetkerlerimen birge, — dedi EO-nyń syrtqy ister jáne qaýipsizdik saıasaty jónindegi joǵarǵy ókili Kaıa Kallas.

Ol Aýstralııany «Eýropanyń eń jaqyn dostarynyń biri» dep atap, aýstralııalyq halyqpen yntymaqtastyǵyn bildirdi.

Eýroparlament tóraıymy Roberta Metsola da shabýyl qurbandaryna jáne Aýstralııadaǵy ári odan tys jerlerdegi evreı qaýymdastyǵyna kóńil aıtty.

— Sıdneıdegi Hanýka merekesiniń bastalýy kezinde Bondı jaǵajaıynda kóptegen adamǵa jasalǵan qorqynyshty shabýyldyń sýretterin kórip, qatty kúızeldim. Bul jaryq (Hanýka shamy — red.) óshpeıdi, — dep jazdy ol.

Anadolu Ajansı agenttiginiń habarlaýynsha, Túrkııa da Hanýka merekesi kezinde jasalǵan terrorıstik aktini qatań aıyptady. Bul týraly Túrkııanyń Syrtqy ister mınıstrliginiń málimdemesinde aıtylǵan.

Vedomstvo qaza tapqandardyń otbasylaryna jáne búkil aýstralııa halqyna kóńil aıtyp, jaralanǵandardyń tezirek saýyǵyp ketýin tiledi.

— Túrkııa terrorızmniń barlyq túri men kórinisine qarsy ustanymyn jáne osy jahandyq qaýipke qarsy kúreste yntymaqtastyqqa daıyn ekenin taǵy da rastaıdy, — delingen málimdemede.

Sıdneıdegi Bondı-bıch jaǵajaıynda bolǵan qarýly shabýyl saldarynan 12 adam qaza taýyp, taǵy 29 adam, onyń ishinde eki polıtsııa qyzmetkeri jaraqat aldy.