Germanııa elektrosamokat júrgizýshilerine qoıylatyn talaptardy kúsheıtpek
ASTANA. KAZINFORM — Germanııada 2025 jyly elektrosamokattardyń qatysýymen bolǵan jol-kólik oqıǵalary kúrt kóbeıdi, dep habarlaıdy DW.
Der Spiegel basylymynyń Federaldyq statıstıka basqarmasynyń derekterine silteme jasap habarlaýynsha, polıtsııa zardap shekkender tirkelgen 16,5 myńǵa jýyq jol apatyn esepke alǵan. Bul 2024 jylmen salystyrǵanda shamamen 38%-ǵa kóp.
Qaıtys bolǵandar sany da aıtarlyqtaı ósken. 2025 jyly elektrosamokatpen baılanysty jol apattarynan 38 adam qaza tapqan, al 2024 jyly bul kórsetkish 27 adam bolǵan. Osylaısha, ólim-jitim 40%-dan astamǵa artqan.
Budan bólek, 1,9 myńǵa jýyq adam aýyr jaraqat alyp, shamamen 16,2 myń adam jeńil jaraqattanǵan.
Mundaı jol apattarynyń basym bóligi iri qalalarda tirkelgen. Zardap shekkender bolǵan oqıǵalardyń jartysyna jýyǵy halqy 100 myńnan asatyn eldi mekenderde, al tórtten birinen astamy 500 myńnan kóp turǵyny bar qalalarda bolǵan.
Jańa statıstıka jarııalanǵannan keıin Germanııanyń TÜV-Verband tehnıkalyq qadaǵalaý qaýymdastyǵy elektrosamokattardy paıdalaný erejeleriniń saqtalýyn qatań baqylaýǵa shaqyrdy. Sarapshylar ereje buzǵandarǵa salynatyn aıyppuldardy kúsheıtip, jaýapkershilikti arttyrý qajet dep sanaıdy.
Sondaı-aq mamandar elektrosamokatty qaýipsiz basqarý daǵdylaryn jol qozǵalysy qaýipsizdigi boıynsha bilim berý baǵdarlamalaryna engizýdi usyndy. Olardyń pikirinshe, ásirese jastarǵa arnalǵan mundaı sabaqtar qaýip-qaterdi durys baǵalaýǵa jáne aýyr jol apattarynyń sanyn azaıtýǵa yqpal etedi.
Aıta ketelik Brıýssel jalǵa beriletin elektrosamokattarǵa tolyq tyıym salady.
