Germanııa eks-prezıdentiniń ulyn dáris kezinde óltirip ketti
NUR-SULTAN. QazAqparat - 1984 jyldan 1994 jylǵa deıin Germanııanyń prezıdenti bolǵan Rıchard fon Vaıtssakerdiń uly 59 jastaǵy Frıts fon Vaıtssakerge seısenbi kúni Berlın aýrýhanasynda dáris oqyp jatqan kezde pyshaq jaraqatyn alyp, keshqurym kóz jumdy. Bul týraly RBB aqparattyq portaly jergilikti polıtsııaǵa silteme jasap habarlaıdy.
Aıta keteıik, qandy oqıǵa Berlınniń Sharlottenbýrg aýdanynda ornalasqan marqumnyń jumys istegen Schlosspark-Klinik emhanasynda bolǵan. Belgisiz er adam Frıts fon Vaıtszekker dáris oqyp jatqan ýaqytta oǵan jaqyndap kelip, pyshaq suqqan.
Polıtsııanyń málimetinshe, dáriske qatysýshylardyń bireýi kómektespek bolǵan kezinde jaraqat aldy. Kóp uzamaı oqıǵa ornyna qaýipsizdik qyzmetkerleri kelip, tyńdaýshylardyń kómegimen qylmyskerdi ustady.
Onyń áreketiniń sebepteri týraly derek joq, tergeý amaldary júrgizilýde.
