Germanııa eki kún ishinde shekarada ustalǵan zańsyz mıgranttardyń 78%-yn elden shyǵardy

ASTANA. KAZINFORM – 7 mamyrdan bastap Germanııa ІІM shekaralyq baqylaýdy aıtarlyqtaı kúsheıtti — kelesi eki kún ishinde federaldy polıtsııa 365 zańsyz mıgrantty ustady, dep habarlaıdy DW.

Olardyń ishinen 286 adam, ıaǵnı 78,3%-y elden shyǵarylǵan. Bul týraly 11 mamyrda Bild gazeti polıtsııa málimetterine silteme jasap habarlady. Elge kirgizbeýdiń basty sebepteri — vızanyń bolmaýy, jalǵan qujattar nemese kirýge tyıym salynǵan mártebe bolǵan.

Gazettiń jazýynsha, 8–9 mamyr kúnderi shekarada ustalǵan mıgranttardyń 23-i bosqyn mártebesin alý týraly ótinish bergen. Alaıda olardyń 19-y báribir elden shyǵarylyp, tek tórteýine elge kirýge ruqsat etilgen. Sol eki kún ishinde 14 adam — zańsyz kóshi-qon uıymdastyrýshylary men 9 ekstremızm men ıslamızmge qatysy bar degen kúdiktiler ustaldy.

Bild basylymy «bosqyndar jónindegi sarapshylarǵa» silteme jasap, Germanııa shekarasyn kún saıyn shamamen 200 bosqyn kesip ótpek bolatynyn jazady. Buryn olardyń shamamen 120-syna kirýge tyıym salynatyn, al 7 mamyrdan bastap jańa ereje kúshine engennen keıin bul kórsetkish 190-ǵa deıin ósken.

Jańa ishki ister mınıstri Aleksander Dobrındt 7 mamyrda Germanııa shekarasynda baqylaýdy kúsheıtý týraly málimdegen. Ol 2015 jylǵa deıin qoldanysta bolǵan erejeni qalpyna keltirdi — oǵan sáıkes, EO elderinen kelgen bosqyndarǵa shekaranyń ózinde-aq kirýge tyıym salynýy múmkin. Tek balalar men júkti áıelder sııaqty «osal toptarǵa» ǵana erekshe jaǵdaı qarastyrylǵan.

Buǵan deıin Eýroodaqtyń qaı elderiniń azamattaryna bosqyn mártebesi berilmeıtini týraly habarlanǵan.

Eske salaıyq, AQSh-ta zańsyz mıgranttardy elden «erikti túrde shyǵarý» baǵdarlamasyn prezıdent Donald Tramp bastaǵan edi.