Germanııa, Chehııa jáne Nıderlandyda nóser jaýyn jaýyp, ózender arnasynan asyp jatyr
Germanııada tolassyz jaýǵan nóser jaýyn saldarynan birneshe ózen sýy arnasynan asyp ketti. Osyǵan baılanysty birqatar eldi meken turǵyndary evakýatsııalandy, dep habarlaıdy Kazinform agenttigi Euronews.com-ǵa silteme jasap.
Germanııada birneshe aımaqtyń, atap aıtqanda Tıýrıngııa men Tómengi Saksonııanyń turǵyndary nóser jańbyr saldarynan Rojdestvo kúni úılerin tastap ketýge májbúr boldy. Erekshe tolassyz jaýynnan jergilikti ózender arnasynan asyp, elektr jelileri men káriz júıeleri buzyldy.
Tıýrıngııa gýbernatory Bodo Rameloý halyqty sabyr saqtaýǵa shaqyrady.
«Adamdar úsh kún boıy úılerine qaıta almaýy múmkin jáne olar osyǵan daıyn bolýlary kerek. Olar úılerine biz jertólelerden sýdy sorǵytyp, elektr qýatyn qalpyna keltirip, káriz júıesin jóndegennen keıin ǵana qaıtady», - dedi ol.
Kórshiles Chehııada da ylǵal kóp, keı aýdandarda joǵary deńgeıli daıyndyq rejımi saqtalyp otyr. Jergilikti bıliktiń aıtýynsha, buǵan jańbyr da, muzdyń belsendi erýi de sebep. Pragada keıbir paromdar jumysyn toqtatty.
Nıderlandyda sınoptıkter qatty jańbyrǵa baılanysty sý deńgeıiniń dınamıkasyn muqııat qadaǵalap otyr. Ózenderge irgeles jatqan aýdandar erekshe baqylaýǵa alyndy.
