Germanııa BUU jelisi boıynsha bosqyndardy qabyldaýdy ýaqytsha toqtatty
ASTANA. KAZINFORM – Germanııa BUU Bosqyndar isi jónindegi Joǵarǵy komıssary basqarmasynyń baǵdarlamasy aıasynda bosqyndardy erikti túrde qabyldaýdy toqtatty, dep habarlaıdy TASS.
Bul týraly Deutsche Presse-Agentur (DPA) Germanııanyń Іshki ister mınıstrligi men BUU basqarmasyna silteme jasap habarlady.
Mundaı sheshim qazir Hrıstıan-demokratııalyq jáne Hrıstıan-áleýmettik odaqtar blogy men Germanııanyń Sotsıal-demokratııalyq partııasy júrgizip jatqan úkimettik koalıtsııa jónindegi kelissózderge baılanysty qabyldandy. Aldyn ala keńesterdiń nátıjesinde olar bosqyndardy erikti túrde qabyldaý baǵdarlamalaryn múmkindiginshe tezirek toqtatyp, jańa baǵdarlamalarǵa qatyspaýǵa kelisti.
Buǵan deıin Germanııa úkimeti 2024–2025 jyldary BUU jelisi boıynsha el aýmaǵynda jalpy sany 13 100 bosqyndy qabyldaýǵa kelisim bergen. Olardyń ishinde 5 061 adam, sonyń ishinde Túrkııadan kelgen sırııalyq bosqyndar Germanııaǵa kelip úlgerdi.
Germanııanyń bolashaq kantsleri bolýy múmkin Frıdrıh Merts bılikke kelse, mıgratsııalyq saıasatty edáýir qatańdatý nıeti bar ekenin birneshe ret málimdegen.
Buǵan deıin Avstrııa da bosqyndardyń otbasylaryn qaıta qaýyshtyrý rásimin toqtatqan bolatyn.
Aıta ketelik Germanııa sırııalyqtarǵa kómek retinde 300 mıllıon eýro bólýdi ýáde etken edi.