Germanııa bıligi jańartylatyn energııa kózderine bólinetin sýbsıdııany qysqartpaq

ASTANA. KAZINFORM —  Germanııa ekonomıka mınıstri Katerına Raıhe jańartylatyn energııa kózderine bólinetin sýbsıdııalardy qysqartýdy josparlap otyr, dep habarlaıdy DW. 

Bul týraly Spiegel jýrnaly jazdy. Salalyq qaýymdastyqtardyń dereginshe, jańartylatyn energııa kózderi eldegi tutynýdyń shamamen 57 paıyzyn qamtamasyz etip otyr. Buǵan deıin mınıstr shaǵyn kún panelderin jeke úılerdiń shatyrlaryna ornatýǵa beriletin memlekettik qoldaýdy toqtatatynyn habarlaǵan edi.

Sonymen birge, Raıhe 2030 jylǵa deıin ekologııalyq taza elektr energııasynyń úlesin 80 paıyzǵa deıin arttyrý maqsatyn saqtap otyrǵanyn atap ótti. Alaıda jańartylatyn energııa kózderinen elektr óndirý kóleminiń aýytqýyn óteý úshin úkimet kómirden birtindep bas tartý aıasynda jańa gaz elektr stansalaryn salýǵa memlekettik qoldaý kórsetýdi josparlap otyr.

Qazirgi ýaqytta jerdegi jel týrbınalary arqyly elektr óndirý kólemi 12 paıyzǵa qysqardy. Buǵan 2025 jyldyń birinshi toqsanynda álsiz jel sebep bolǵan. Bul aldyn ala esepteýlerdi Baden-Vıýrtembergtegi Kún energııasy men sýtegi zertteý ortalyǵy (ZSW) jáne Germanııa energetıka jáne sý sharýashylyǵy federaldyq odaǵy (BDEW) jarııalady. Atalǵan derekterge sáıkes, jalpy elektr energııasyn óndirý ótken jyldyń dál osy kezeńimen salystyrǵanda 0,9 paıyzǵa joǵary bolǵan. 

Aıta ketelik Germanııada álemdegi eń bıik jel týrbınasy salynyp jatqany týraly jazǵan edik.