Germanııa balalardyń zeınetaqy shotyna aı saıyn 10 eýrodan aýdarmaq
ASTANA. KAZINFORM — Germanııa Býndestagy balalarǵa arnalǵan zeınetaqy jınaqtary týraly zańdy maquldady, oǵan sáıkes jeke ınvestıtsııalyq shottarǵa aı saıyn 10 eýro kóleminde memlekettik tólemder aýdarylady, dep habarlaıdy Deutsche Welle.
«Zeınetti erte bastaý» zańy (Frühstartrente) 16 qazanda bıleýshi koalıtsııa músheleriniń kópshiliginiń qoldaýyna ıe boldy. Baǵdarlama erte jastan zeınetaqy jınaýǵa jáne balalardyń qarjylyq saýattylyǵyn arttyrýǵa baǵyttalǵan.
Jańa erejelerge sáıkes, memleket 6 jastan 18 jasqa deıingi balalardyń jınaq shottaryna aı saıyn 10 eýro aýdarady. Al ata-analary men ata-ájeleri jylyna qosymsha 6840 eýroǵa deıin salýyna bolady.
Ata-analar ınvestıtsııalyq shot ashý úshin jeke mekemeni tańdaı alady. Eger ınvestıtsııalyq shot ashpasa, memleket qarajatty Deutsche Bundesbank basqaratyn arnaıy federaldy qorǵa aýdaryp otyrady. 18 jasqa tolǵannan keıin qatysýshylar óz jınaqtaryn óz betinshe toltyra alady jáne 25 jasqa deıin qarajatty jeke zeınetaqy josparyna aýdara alady.
Germanııanyń qarjy mınıstri Lars Klıngbaıl baǵdarlama balalarǵa bolashaq zeınetaqyǵa shyǵý úshin bastapqy kapıtal beretinin jáne olarǵa jeke qarjylaryn basqarýdy úıretetinin atap ótti.
Degenmen, bul bastama oppozıtsııa tarapynan synǵa ushyrady. Jasyldar men Solshyl partııa ókilderi baǵdarlama áleýmettik teńsizdikti kúsheıtýi múmkin dep sanaıdy, sebebi baı otbasylar qosymsha jarnalar sala alady, al az qamtylǵan otbasylardyń balalary tek memlekettik qoldaýmen shekteledi.
Solshyl partııa depýtaty Izabel Vandreniń esepteýlerine sáıkes, 12 jyl boıy tek memlekettik járdemaqy alatyn balanyń shotyna, ınvestıtsııalyq kiristi qospaǵanda, 1440 eýro ǵana túsedi. Al ata-analary qosymsha jarna salyp otyratyn balaldyń shotyndaǵy soma 83 520 eýroǵa jetýi múmkin.
Baǵdarlama 2026 jyldyń 1 qańtarynan bastalýy qajet, ıaǵnı ótken aılarǵa da aýlarylady, sonda 2020 jyly týylǵan balalar túgel qamtylady. 2027 jyldan bastap zańǵa jyl saıyn alty jasar balalardyń jańa jas toptary qosylyp otyrady.
Zańnyń kúshine enýi úshin ony Germanııanyń federaldy jerleriniń ókilderi sanalatyn palata Býndesrat maquldaýy qajet.
Eske sala keteıik, Qazaqstanda Biryńǵaı jınaqtaýshy zeınetaqy qorynyń aktıvteri jyl basynan beri 6,1%-ǵa ulǵaıdy.
