Germanııa azamatyn óltirgen pavlodarlyq qyzdar 16 jylǵa sottaldy
ASTANA. QazAqparat - Pavlodar oblystyq mamandandyrylǵan aýdanaralyq qylmystyq sotta 19 jastaǵy pavlodarlyq eki qyzǵa Germanııa azamatyn óltirgenderi úshin sheshim shyǵaryldy, dep habarlaıdy pavlodarnews.kz.
Sot Marııa Evpovar men Irına Mıhaılıýkti toptasyp kisi óltirgenderi jáne iri kólemde urlyq jasaǵandary úshin aıypty dep tanydy.
«Árqaısysyna 16 jylǵa bas bostandyǵynan aıyrý jáne jazalaryn qaýipsizdigi ortasha deńgeıdegi qylmystyq-túzetý mekemesinde óteý jazasy taǵaıyndalsyn, - dep oqydy sheshimdi sýdıa Qudabaı Sultanov. Sonymen qatar, sot eki qyzǵa japa shegýshi jaqqa eki mıllıon teńgeden ótemaqy tóleýge mindettedi. Sottalýshylar bul qarjyny 2018 jyldyń 30 maýsymyna deıin óteýi tıis. Sot sheshimi zańdy kúshine engen joq.
Eske salaıyq, 2018 jyldyń qańtar aıynda Germanııa azamatyn óltirý isi jabyq kúıde qarala bastaǵan bolatyn. Oqıǵa ótken jyldyń qazan aıynda Pavlodar qalasynyń Ýsolka shaǵynaýdanyndaǵy úılerdiń birinde bolǵan. Kúdikti retinde jaldamaly páterde birge turatyn 19 jastaǵy qyzdar ustalǵan bolatyn. Aıyptalýshylardyń bireýi dámhanada daıashy bolyp istese, ekinshisi jergilikti medkolledjdiń stýdenti. Tergeýshilerdiń málimetinshe, jas qyzdar jigitke 20 ret pyshaq jaraqatyn salǵan.
