Germanııa azamaty iri somada aqshasyn taýyp bergen qostanaılyq polıtseılerge alǵys aıtty

QOSTANAI. QazAqparat – Germanııa azamaty iri somada aqsha salynǵan ámııanyn tez arada taýyp bergen Jitiqara polıtseılerine alǵys aıtty. Bul týraly Qostanaı oblysynyń Polıtsııa departamentinen málim etti, dep habarlaıdy QazAqparat tilshisi.

Oleg Kovalkov Jitiqaradaǵy týystaryna kelgen. 6 maýsym kúni Germanııaǵa keri bıleti bolǵan. Bir kún buryn, ıaǵnı 5 maýsymda jolǵa jınalyp, dúkenge barǵan.

«Shaǵyn dúkenge kirip, azyq-túlik satyp aldym. Birneshe saǵattan keıin kózildirik satyp alý úshin optıkaǵa bardym. Sol jerde ámııannyń joq ekenin baıqadym», - dep eske aldy Oleg Kovalkov.

Onyń aıtýynsha, ámııanda 2 myń eýro, 100 myń teńge jáne jeke qujattary bolǵan. Sodan keıin qaıta dúkenge baryp, ámııandy izdestirgen. Qujattary tabylmaǵan soń, Germanııa azamaty polıtsııa kómegine júgingen.

Polıtseıler O. Kovalkov barǵan dúkenniń beınekameralary taspalaryn tekserip shyqqan. Vıdeo boıynsha ámııandy dúkenge kelgen beıtanys er adam alǵany anyqtaldy. Dúkenshi de ol adamdy tanymaıtynyn aıtqan.

Osydan keıin polıtsııa dúkennen shyqqan atalǵan adam júrip ótken baǵdardaǵy beınebaqylaý kameralaryn qarap otyryp, onyń toqtaǵan úıin anyqtady. Ýchaskelik ınspektorlar kúdikti adamdy taýyp, sheteldik azamattyń qujattary men aqshasyn qaıtaryp berdi.

«Polıtsııanyń jedel áreketin kórdim. Eki saǵat ishinde qujattarymdy taýyp berdi. Osy oraıda olardyń barlyǵyna alǵysymdy aıtamyn», - dedi O. Kovalkov.

Ámııandy jymqyrǵan 58 jastaǵy Jitiqara turǵynyna qatysty sotqa deıingi tergeý bastaldy.

Avtory Janna Musabekova