Germanııa azamattyq berý rekordyn jańartty: sırııalyqtar men túrikter kósh bastady
ASTANA. KAZINFORM — 2025 jyly Germanııa azamattyǵyn 332,5 myń sheteldik alǵan. Bul – 2000 jyldan beri statıstıka júrgizile bastaǵaly tirkelgen eń joǵary kórsetkish, dep habarlaıdy BILD.
Germanııa azamattyǵyn alǵandar sany aldyńǵy jylmen salystyrǵanda 40,5 myń adamǵa artqan.
Germanııa federaldyq statıstıka basqarmasynyń derekterine sáıkes, baqylaý júrgizile bastaǵannan beri alǵash ret bir jyl ishinde azamattyq alǵandar sany 300 myńnan asty.
Jańa azamattardyń eń úlken tobyn burynǵysha Sırııadan kelgender quraıdy. 2025 jyly Germanııa tólqujatyn 65,6 myń sırııalyq alǵan, bul barlyq natýralızatsııalanǵan azamattardyń shamamen 20 paıyzyna teń. Alaıda bul kórsetkish aldyńǵy jylmen salystyrǵanda 21 paıyzǵa tómen bolǵan.
Ekinshi orynda Túrkııa azamattary tur. Germanııa azamattyǵyn 34,1 myń túrik alǵan, bul eldiń jańa azamattarynyń shamamen 10 paıyzy.
Reseıden shyqqan azamattar arasynda da aıtarlyqtaı ósim tirkeldi. Bir jyl ishinde Germanııa azamattyǵyn 19,7 myń reseılik alǵan. Olardyń úlesi barlyq natýralızatsııalanǵan azamattardyń 6 paıyzyna jetken. Bul kórsetkish 2024 jylmen salystyrǵanda 51 paıyzǵa joǵary.
Sondaı-aq Germanııa azamattyǵyn alǵan AQSh azamattarynyń sany eki eseden astam ósken. 2025 jyly Germanııa tólqujatyn 6,6 myń amerıkalyq ıelengen.
Buǵan deıin Germanııada azamattyq alý talaptary kúsheıtilýi múmkin ekeni habarlandy.
