Germanııa aýmaǵyna meteorıt synyqtary tústi

ASTANA. KAZINFORM - Germanııanyń batysynda meteorıt fragmentteriniń qulaýynan birneshe turǵyn úıge zaqym keldi, dep habarlaıdy DW.

8 naýryz keshke Batys Germanııanyń kóptegen turǵyny aspandaǵy erekshe jaryq qubylysyn baıqaǵan. Tómengi Saksonııa, Gessen, Reınland-Pfalts, Saar, Baden-Vıýrtemberg jáne Soltústik Reın — Vestfalııa turǵyndary áleýmettik jelilerde vıdeo men fotolar jarııalaǵan.

Polıtsııanyń jedel shtabynyń málimetinshe, oqıǵa týraly alǵashqy habarlamalar Koblents qalasynan, sondaı-aq Hýnsrıýk jáne Aıfel taý jotalary ornalasqan Reınland-Pfalts aımaǵynan túsken.

— Keshki ýaqytta Koblents qalasynyń Gıýls aýdanyndaǵy turǵyn úıdiń shatyryna aspannan zat qulady. Oqıǵa saldarynan eshkim zardap shekken joq. Oqıǵa ornyna órt sóndirýshiler men polıtsııa qyzmetkerleri jetti, qazirgi ýaqytta qaýip joq, — dep polıtsııanyń habarlamasyn dpa agenttigi keltiredi.

Al AFP agenttiginiń dereginshe, keıbir adamdardyń jaraqat alǵany týraly da málimet bar.

Kaızerslaýtern qalasynyń polıtsııasy turǵyndardyń «sońynan qysqa jalyn jarqyraǵan ushatyn nysandy» nemese aspandaǵy jarqyldy kórgenin aıtqanyn málimdedi. Alǵashqy boljamdardyń biri retinde zymyrannyń ushýy da aıtylǵan. Alaıda quqyq qorǵaý organdary qaýipsizdikke qater tóndiretin belgiler joq ekenin atap ótti.

Osyǵan deıin Qazaqstan ǵalymdary ǵarysh qoqysyn joıýdyń jańa tásilderin usynǵany týraly jazdyq.