Germanııa áskerindegi áıelderdiń 75%-y jynystyq qysymǵa tap bolǵan
ASTANA. KAZINFORM – Germanııa Qarýly kúshteriniń bolashaq basshysy, Býndesverdiń jańa bas ınspektory Krıstıan Froıdıng áskerdegi jynystyq sıpattaǵy qysym kórsetý áreketterine qarsy kúresti kúsheıtetinin málimdedi, dep habarlaıdy DW.
Krıstıan Froıdıng bul týraly Bild am Sonntag aptalyǵyna bergen suhbatynda aıtty.
Jaqynda jarııalanǵan zertteý nátıjesine sáıkes, Býndesverde qyzmet etetin áıelderdiń 75%-y jáne er áskerı qyzmetshilerdiń 35%-y keminde bir ret jynystyq sıpattaǵy tıisýge nemese qysym kórsetýge tap bolǵan.
Froıdıng zertteý nátıjelerin «tózgisiz jaǵdaı» dep baǵalap, mundaı áreketterge qatań tosqaýyl qoıý qajettigin atap ótti.
– Mundaı jaǵdaılar anyqtalǵan jerde olarǵa aıaýsyz tosqaýyl qoıýymyz kerek. Meniń Býndesverim mundaı emes. Jekelegen adamdardyń orynsyz áreketterinen búkil qarýly kúshterdiń bedeline nuqsan kelýi tózgisiz jaǵdaı, – dedi ol.
Froıdıngtiń aıtýynsha, ózi de áskerı ortada osyndaı jaǵdaılarǵa kýá bolǵan.
– Men sózben tıisý jaǵdaılaryn kezdestirdim. Biraq bir nemese birneshe adamnyń birden aralasyp, «Toqta, bulaı jasaýǵa bolmaıdy! Bizdiń ortamyzda mundaıǵa jol joq!» dep toqtatqanyn da birneshe ret kórdim, – dedi ol.
General-leıtenant mundaı áreketke kýá bolǵan árbir áskerı qyzmetshi dereý aralasýǵa mindetti ekenin aıtty.
Qazirgi ýaqytta Býndesverdiń qurlyq áskerleriniń ınspektory qyzmetin atqaryp otyrǵan Froıdıng qarýly kúshterdegi basqarý mádenıetin ózgertý qajet dep esepteıdi.
Onyń pikirinshe, mundaı oqıǵalar áskerdiń jaýyngerlik qabiletine de áser etedi.
– Basqarý mádenıetin úzdiksiz jetildirýge bárimiz, ásirese áskerı basshylar jaýaptymyz, – dedi Froıdıng.
Ol áskerı ortadaǵy qarym-qatynas ózara qurmetke negizdelýi tıis ekenin atap ótti. Óıtkeni jaýyngerlik joldastyq pen senim áskerdiń tabysty áreket etýiniń basty sharttarynyń biri sanalady.
– Biz, áskerı qyzmetshiler, jaýyngerlik joldastyq bar jerde ǵana urysta tabysqa jete alatynymyzdy bilemiz, – dedi ol.
Sonymen qatar Froıdıng áskerı qyzmetshilerden túsetin shaǵymdardy qaraý merzimin qysqartýǵa ýáde berdi.
– Mundaı isterdiń áldeqaıda jyldam qaralýyna erekshe nazar aýdarýymyz kerek. Keıde iske qatysy bar adamdar onyń zańdy túrde túpkilikti sheshilýin tózgisiz uzaq ýaqyt kútedi, – dedi general-leıtenant.
Onyń aıtýynsha, Býndesver qoldanystaǵy tártiptik sharalardy tolyq kólemde paıdalanýy qajet.
Aıta keteıik, buǵan deıin Germanııada áskerı qyzmetten bas tartqandar sany kúrt óskeni habarlanǵan edi. 2026 jyldyń alǵashqy segiz aıynda 12 102 adam áskerı qyzmetten bas tartý týraly ótinish bergen. Bul 2025 jylǵy jalpy kórsetkishten úsh eseden astam kóp.