Germanııa Áskerı-teńiz kúshteriniń áskerı kemesin alǵash ret áıel basqardy
ASTANA. KAZINFORM – Ýte Nıklas Germanııa floty tarıhynda alǵash ret fregatty basqarǵan áıel atandy, dep habarlaıdy BILD.
Ol «Raınland-Pfalts» kemesin kapıtan Benedıkt Aıhhornnan qabyldap aldy. Endi Nıklasqa fregat pen onyń 126 áskerı qyzmetshiden turatyn ekıpajyn keme jóndeý zaýytyndaǵy jóndeý jumystarynan keıin tolyq jaýyngerlik ázirlikke keltirý mindeti tur.
Basylymnyń jazýynsha, Nıklas úshin «Raınland-Pfalts» kemesinde qyzmet etý alǵash ret emes. Buǵan deıin ol osy kemede birinshi ofıtser bolǵan. Sońǵy ýaqytta Berlın mańyndaǵy Shvılovzee qalasynda Býndesverdiń sheteldegi operatsııalar qolbasshylyǵynda jedel shtab ofıtseri bolyp jumys istegen.
— Germanııada áıelderge barlyq áskerı mamandyqqa 2001 jyly ǵana qoljetimdilik berildi. Qazir Býndesverde 25 myńnan astam áıel áskerı qyzmetshi bar. Bul áskerı qyzmetshilerdiń 13 paıyzynan sál asady, — dep jazylǵan basylymda.
Buǵan deıin Ulybrıtanııada áıel adamnyń memlekettik qyzmet basshysy bolǵany alǵash ret habarlanǵan edi.
