Germanııa alty aılyq áskerı qyzmetti engizýdi josparlap otyr

ASTANA. KAZINFORM — Germanııa elde ulttyq qorǵanysty kúsheıtip, kóbirek rezervısterdi daıarlaý maqsatynda alty aılyq erikti áskerı qyzmetti engizýdi josparlap otyr, dep habarlaıdy Kazinform agenttiginiń menshikti tilshisi. 

Reuters agenttiginiń habarlaýynsha, eriktiler qarapaıym mindetterdi – mysaly, kúzet qyzmetin atqarýǵa úırenedi. Alaıda eriktiler sany jetkiliksiz bolsa, úkimet mindetti áskerı qyzmetti qaıta engizý múmkindigin qarastyrýy múmkin.

Atap ótilgendeı, Germanııanyń qorǵanys mınıstri Borıs Pıstorıýs ásker sanynyń qazirgi 180 myńnan 260 myńǵa deıin artýyn qalaıdy. Derekkózderdiń aıtýynsha, úkimet alty aılyq erikti daıyndyq osy maqsatqa jetýge kómektesedi dep úmittenip otyr jáne eriktilerdiń bir bóligi áskerı qyzmetin ári qaraı jalǵastyrýy múmkin.

Baǵdarlamaǵa qatysýshylar ishki qaýipsizdik salasy boıynsha da qosymsha daıyndyqtan óte alady – mysaly, júk kóligi júrgizýshisiniń kýáligin alý nemese tank júrgizýshisi retinde daıarlyqtan ótý. Sonymen qatar, sarbazdar oqýyn óz úıine jaqyn jerde ótkize alýy úshin jańa kazarmalar salý josparlanyp otyr.

Basylymnyń jazýynsha, eger úkimet erikti qabyldaý boıynsha kózdelgen mejege jete almasa, mindetti qyzmetke naqty kimdi shaqyratyny ázirge belgisiz kúıinde qalyp otyr. Eske sala keteıik, Germanııada mindetti áskerı qyzmet 2011 jyly toqtatylǵan.

Buǵan deıin habarlanǵandaı, nemisterdiń 54%-y mindetti áskerı qyzmetti qaıta engizýdi qoldaıdy.

Aıta ketelik Germanııa vıza berýden bas tartýǵa shaǵymdaný tártibin joıatyny týraly jazǵan edik.