Germanııa áleýmettik tólemderge qosymsha 5,7 mlrd eýrodan astam qarajat bólmek
ASTANA. KAZINFORM — Germanııa úkimetine áleýmettik tólemderdi júzege asyrý úshin 2026 jyly qosymsha 250 mln eýro (shamamen 126,8 mlrd teńge) qajet boldy. Bul buǵan deıin áleýmettik qoldaýǵa jumsalatyn shyǵyndardy qysqartý josparyna qaramastan týyndap otyr. Bul týraly Kazinform BILD basylymyna silteme jasap habarlady.
Tagesspiegel basylymynyń Germanııa Qarjy mınıstrliginiń hatyna silteme jasap jazýynsha, Eńbek jáne áleýmettik máseleler mınıstrligi bıýdjetten qosymsha qarajat bólýdi suraǵan.
2026 jylǵy shildeden bastap Germanııada burynǵy Bürgergeld járdemaqysynyń ornyna bazalyq áleýmettik qamsyzdandyrýdyń jańa júıesi engizildi. Buǵan deıin kantsler Frıdrıh Merts reforma jyl saıyn shamamen 5 mlrd eýro (2,54 trln teńge) únemdeýge múmkindik beretinin málimdegen. Al HDS/HSS blogynyń keıbir ókilderi únemdeletin qarajat 10 mlrd eýroǵa (5,07 trln teńge) deıin jetýi múmkin ekenin aıtqan.
Sonymen qatar Frankfurter Allgemeine Zeitung basylymynyń málimetinshe, Germanııanyń Federaldyq eńbek agenttigi jumyssyzdyq boıynsha járdemaqy tóleý úshin qosymsha 5,05 mlrd eýro (2,56 trln teńge) qaryz qarajatyn qajet etedi.
Buǵan qosa, eldiń zeınetaqy júıesine memlekettik bıýdjetten taǵy 408 mln eýro (shamamen 207 mlrd teńge) bólý qajet.
Osylaısha, qosymsha bıýdjet qarajaty men qaryzǵa degen jalpy qajettilik 5,7 mlrd eýrodan (2,89 trln teńge) asady.
Buǵan deıin Germanııada jumyssyzdar sany úsh mıllıonǵa jýyqtaǵany habarlanǵan edi. Sonymen qatar bir jylda jumyssyzdyq boıynsha saqtandyrý tólemderin alýshylar sany 88 myń adamǵa artyp, 1,065 mıllıonǵa jetken.
