Germanııa AQSh pen Ulybrıtanııaǵa qarsy tyńshylyq jasaı bastamaq
ASTANA. QazAqparat - Germanııa Úkimeti AQSh pen Ulybrıtanııa tyńshylarynyń qyzmetin jiti baqylaýǵa almaq, dep habarlaıdy lenta.ru Deutsche Welle-ge silteme jasaı otyryp. Saıttyń málimetinshe, mundaı sheshim jýyrda GFR-daǵy amerıkalyq arnaıy qyzmet tyńshylaryna baılanysty oryn alǵan janjalǵa negizdelip otyr.
Brıtandyq The Independent gazetiniń jazýynsha, atalmysh buıryqty GFR kantsleri Angela Merkel bergen. Basylymnyń málimetteri boıynsha, tyńshylyq qara tizimge ilingen tyńshylarǵa qarsy ǵana emes, sonymen qatar, sheteldik elshilikterdiń elektrondy hattary men telefon arqyly sóılesýlerine de júrgiziledi. Germanııanyń Frankfurter Allgemeine Zeitung gazetine bergen suhbatynda Konstıtýtsııany qorǵaý Federaldy vedomstvosynyń basshysy Hans-Georg Maasen Berlınniń sondaı-aq odaqtas elderdiń tyńshylyǵyna qarsy sharalar da qoldanatynyn málimdegen. Sonymen qatar, onyń aıtýynsha, Germanııa Úkimeti AQSh tarapynan jasalyp otyrǵan tyńshylyqqa budan ári tózip otyra bermeıdi. «Shydamnyń de shegi bar. GFR-da málimet jınap jáne aqparat berýshilerdi jaldaı otyryp, amerıkalyq arnaıy qyzmet ókilderi bizdiń zańdarymyzdy óreskel buzýda», - deıdi H. Maasen. Aıta keteıik, bıylǵy shilde aıynda Germanııada eki birdeı jansyz áshkerelendi. Olar amerıkalyq arnaıy qyzmettermen áriptes bolǵan dep aıyptalýda. Olardyń biri ishki alman barlaýynda qyzmet etse, ekinshisi GFR-diń qorǵanys salasynda eńbek etken bolyp shyqty.
