Germanııa AQSh-pen klımattyq baj salyǵyna baılanysty daýǵa daıyndalyp jatyr

ASTANA. KAZINFORM – Germanııa qorshaǵan orta mınıstri Karsten Shnaıder Eýropalyq odaq pen AQSh arasynda klımattyq saıasatqa baılanysty shıelenis bolatynyn rastady, dep habarlaıdy DW.

– Iá, biz AQSh-pen daýǵa tap bolamyz, buǵan eshqandaı kúmán joq, – dedi mınıstr ARD telearnasyna bergen suhbatynda.

Onyń aıtýynsha, Eýropa dekarbonızatsııa protsesin tıimdi júzege asyrý úshin klımattyq baj salyǵyn engizýge májbúr.

– Klımattyq maqsattardy Konstıtýtsııaǵa engizip, halyqaralyq kelisimderge qol qoısaq, keıin ony oryndamaı otyrýǵa bolmaıdy, – dep atap ótti Shnaıder.

Eske salaıyq, 2027 jyldan bastap Eýropalyq odaqta transshekaralyq kómirtek retteý mehanızmi (CBAM) kúshine enedi. Ol ekologııalyq standarttary tómen elderden ákelinetin ónimderge arnaıy baj salyǵyn engizýdi kózdeıdi.

Bul shara eýropalyq ónerkásipti ádiletsiz básekeden qorǵaý jáne klımattyq mindettemelerdi oryndaýdy qamtamasyz etý maqsatynda qabyldanǵan.

Alaıda sarapshylardyń pikirinshe, jańa erejelerge AQSh ta iligýi múmkin, bul eki tarap arasyndaǵy saýda qatynastaryn kúrdelendiredi.

Aıta keteıik, keshe Germanııa kantsleri klımattyń ózgerýin talqylaý úshin Brazılııaǵa bardy.