German Nurbaev TMD Ekonomıkalyq sotynyń tóraǵasy bolyp saılandy
ASTANA. KAZINFORM — Qazaqstan Joǵarǵy Sotynyń tóraǵasy Aslambek Merǵalıev Mınskide (Belarýs) TMD Ekonomıkalyq soty plenýmynyń jumysyna qatysty.
Qatysýshylar arasynda múshe memleketterdiń joǵary sot organdarynyń ókilderi men TMD ES sýdıalary boldy.
Qatysýshylarǵa izgi tilegin bildire otyryp, A.Merǵalıev TMD Ekonomıkalyq sotynyń memleketaralyq ekonomıkalyq daýlardy sheshýdegi áleýetin jáne onyń Ad hoc jumysynyń zamanaýı formatyn atap ótip, sot tóreliginiń qoljetimdiligi men sýdıalardyń utqyrlyǵyna nazar aýdardy.
Kezdesý barysynda Ekonomıkalyq sottyń yntymaqtastyǵy men qyzmetin damytýǵa qosqan úlesi úshin A.Merǵalıev TMD Ekonomıkalyq sotynyń Qurmet gramotasymen marapattaldy.
Qazaqstannyń sot júıesi úshin mańyzdy oqıǵa jáne Pleným otyrysynyń negizgi máselesi Qazaqstan Respýblıkasynan QR Joǵarǵy Sotynyń jáne TMD Ekonomıkalyq sotynyń sýdıasy German Nurbaevtyń TMD Ekonomıkalyq sotynyń tóraǵasy bolyp saılanýy boldy.
Pleným músheleri Ǵ.Nurbaevtyń kandıdatýrasyn biraýyzdan qoldady.
Tanystyrý kezinde onyń joǵary kásibıligi jáne zań salasyndaǵy kóp jyldyq tájirıbesi atap ótildi.
Qazaqstan ókiliniń TMD Ekonomıkalyq Sotyndaǵy tóraǵalyǵy otandyq sot júıesiniń jańa tarıhynyń jańa taraýyn ashady jáne elimizdiń TMD quqyqtyq ınstıtýttaryn damytýdaǵy róliniń artyp kele jatqanynyń dáleli bolyp tabylady.
TMD ES tóraǵasynyń orynbasary bolyp qyrǵyzstandyq Aıbek Davletov saılandy.
A.Merǵalıev Andreı Plotnıkovke tóraǵa retindegi jemisti jumysy jáne TMD Ekonomıkalyq sotynyń damýyna qosqan úlesi úshin alǵys bildirdi.
Aıta keteıik, Ekonomıkalyq sot – TMD-nyń jarǵylyq organy, óz qyzmetin ad hoc formatynda naqty isterdi qaraý boıynsha júzege asyratyn turaqty jumys isteıtin halyqaralyq sot organy.
Sot TMD-ǵa qatysýshy memleketterdiń ózderiniń ekonomıkalyq mindettemelerin oryndaýyn qamtamasyz etýge shaqyrylǵan jáne TMD-ǵa qatysýshy memleketter arasyndaǵy daýlardy qaraý jáne Dostastyqtyń halyqaralyq quqyqtyq aktilerin túsindirý quzyretine ıe.
Sottyń ornalasqan orny - Mınsk qalasy, Belarýs Respýblıkasy.
Eske salaıyq, keshe Qazposhtanyń jańa basshysy taǵaıyndaldy.