German Gmaıner halyqaralyq syılyǵynyń fınalyna shyqqan Álııa Raeva otandastarynan qoldaý kútedi
NUR-SULTAN. QazAqparat - Jeńil atletıkadan Qazaqstan paralımpıada quramasynyń múshesi Álııa Raeva German Gmaıner halyqaralyq syılyǵynyń fınalyna shyqty, dep habarlaıdy QazAqparat tilshisi.
«Joǵarydaǵy vıdeoda - jas ana, jeńil atletıkadan Qazaqstan paralımpıada quramasynyń múshesi Álııa Raeva. Bıyl ol jetim balalarǵa arnalǵan otbasylyq úlgidegi SOS-balalar aýylynyń negizin qalaýshy German Gmaıner halyqaralyq syılyǵynyń fınalyna shyqty. Qazirgi ýaqytta Álııa 2-orynda tur. Degenmen ol daýys berip, jeńiske jetýine kómek bere alatyn otandastarynyń qoldaýyna senim artady. Nebári myna siltemege ótip, Álııa Raevaǵa daýys berý qajet. Bárimiz birigip, Álııanyń armanynyń oryndalýyna kómekteseıik», - dep jazdy Marat Iǵalı Facebook paraqshasynda.
Álııa Raeva tserebraldy sal aýrýymen dúnıege kelgennen keıin anasy birneshe kúnnen soń tastap ketken. 5 jasynan 1996 jyly Almatydaǵy SOS-balalar aýylyna ornalastyrylǵan. Álııa bala kezinde aıaǵyna úsh ret ota jasatyp, dárigerler onyń júrip ketetindigine senimsizdik bildirgen bolatyn. Biraq, ol júrip qana qoımaı, paralımpıadashy da bolǵan edi.
Aıta keteıik, Gmaıner halyqaralyq syılyǵynyń fınalyna búkil álemnen 200 úmitker bolyp, onyń 8-i, ıaǵnı 4 áıel, 4 erkek fınalǵa shyqty. 23 shilde kúni aıaqtalatyn fınaldyq daýys berýdiń qorytyndysynda eń kóp daýys jınaǵan 2 jeńimpaz tańdap alynady.
