Geosaıası jaǵdaı ózgerse, munaı tasymalynyń qandaı joly bar – sarapshy pikiri

ASTANA. KAZINFORM – Táýelsiz sarapshy, Energy analytics kanalynyń avtory Abzal Narymbetov qazaqstandyq munaıdy syrtqa tasymaldaýdyń balamaly jolyn atady.

- Biz 70 mln tonna munaıdy syrtqa jóneltemiz. Sonyń 56 mln tonnasy Kaspıı qubyr konsortsıýmy arqyly, 10 mln tonna munaı «Atyraý-Samara» arqyly jáne 1,5 mln tonnasy Aqtaý arqyly jóneltiledi, qalǵan 1 mln tonna munaı Qytaıǵa ketedi. Aqtaý baǵytynda negizi 5-6 mln tonnaǵa deıin kóterýge bolady. Memleket basshysy aıtqandaı, munaı óndirýdi 20 mln tonnaǵa ósirý jospary bar. Geosaıası jaǵdaı shıelenisip ketken jaǵdaıda, biz Reseıden jónelte almasaq, balama jol bolý kerek, - deıdi Abzal Narymbetov.

Osy oraıda sarapshy qazaqstandyq munaıdy Aqtaý porty arqyly jóneltýdi jón dep otyr. 

- Munaı óndirisin 20 mln tonnaǵa jetkizý úshin qarajat quıý kerek, ınfraqurylym qurý qajet. Sondyqtan qazir bizde búkil munaıdy basqa baǵytqa jiberýdiń balama joly joq. Belgili bir bóligin Aqtaý arqyly jáne Qytaıǵa jibere alamyz. Qazir Qytaıǵa 1 mln tonna munaı jiberip jatyrmyz, ony 10 mln tonnaǵa deıin kóterýge bolady. Al qalǵan munaıdy jaǵdaı ózgerse shyǵara almaı qalýymyz múmkin, - deıdi ol.

Buǵan deıin Energy analytics kanalynyń avtory Abzal Narymbetov munaı óndirisiniń kólemine qatysty statıtıska boıynsha pikir bildirgen edi.