Geosaıası turaqsyzdyq kúsheıse, ishki týrızmge suranys artady – depýtat
ASTANA. KAZINFORM – Jyl saıyn qazaqstandyqtar shetelde demalýǵa 4 mlrd dollar jumsaıdy. Bul qarajat ózgeniń emes, óz elimizdiń ekonomıkasynda qalýy tıis edi. Ásirese bıyl geosaıası turaqsyzdyq kúsheıip, ishki týrızmge suranys artýy múmkin.
Máselen Alakólge keletin 1,5 mıllıon týrıstiń sany kóbeımese, azaımaıdy. Al ınfraqurylym týrıster aǵynyna daıyn emes. Búgin Májiliste Respublica partııasy fraktsııasy Alakóldiń jaı-kúıi týraly keńeıtilgen otyrys ótkizdi.
Toǵyz aı buryn azamattardyń kóptegen ótinishterinen keıin Prezıdent Alakól týrıstik aımaǵyndaǵy daıyndyqtyń tómen deńgeıin synǵa alyp, Úkimetke qysqa merzimde týrıstik baǵyttardy retke keltirýdi tapsyrǵan edi. Al jazǵy maýsymnyń bastalýyna nebári eki aı qaldy.
– Statıstıkaǵa súıensek, byltyr elimizge 15 mıllıonnan astam týrıst kelgen. Bıyl bul kórsetkish odan ári ósedi dep kútilip otyr. Ásirese álemdegi geosaıası terbelister, ýshyqqan jaǵdaılar men túrli shekteýler artyp, Qazaqstanǵa keletin týrıster sany kóbeıetini anyq. Mysaly, qazaqstandyqtar shetelde demalý úshin jyl saıyn shamamen 4 mlrd dollardan astam qarajat jumsaıdy. Biz basqa eldiń ekonomıkasyna osyndaı úles qosyp jatyrmyz. Álemdegi túrli saıası jáne ekonomıkalyq qubylystardy eskerip, osy qarajatty ishki týrızmdi damytýǵa baǵyttasaq, kóptegen máselelerdi sheshý múmkindigi týar edi. Ol úshin barlyq jaǵdaıdy jasaýymyz qajet, – dedi fraktsııa jetekshisi Aıdarbek Qojanazarov.
Májilis depýtaty Ekaterına Smolıakova 2025 jyly týrıstik áleýeti joǵary óńirlerge saparlap, ózekti problemalardy zerdelegen. Búgingi otyrysta depýtat áýe bıletteriniń qymbattyǵyn, uıaly baılanys pen ınternettiń joqtyǵyn, káriz júıesiniń retsizdigi problemasyn kóterdi. Sý shaıyp ketken jaǵajaılardy da nyǵaıtý qajet.
– Tipti sýdyń astyna ketip qalǵan demalys oryndary bar. Ony kásipker óz aqshasyna saldy ǵoı kezinde, sýǵa ketse obal ǵoı. Ony sheshýdiń joly – tolqyndy toqtatatyn qurylǵylardy ornatý. Ol óte qymbat jáne bazalyq ınfraqurylym, ony memleket jasaýy kerek. Sosyn Alakólde 5 shaqyrym jaǵajaı bolsa, ákimdik sonyń 450 metrin ǵana jıtnastyrady. Qalǵan 4,5 shaqyrymdy kásipkerler óz aqshasyna jınap júr. Kúnde 2-3 mashına qoqys shyǵarady, – dedi E. Smolıakova.
Áıtse de, Alakólge sheteldik ınvestorlardyń qyzyǵýshylyǵy artyp otyr. Abaı oblysynda Qytaı men Ázerbaıjan ınvestorlary jańa demalys oryndaryn josparlaýdy bastap ketken.
Bul úshin oblys ákimdigi ozyǵy jetken elektr jelilerin jańartyp, jol salyp, ınternetpen qamtýdy bastap ketti. Oǵan qosa, Alakól men Jıdebaıda vızıt ortalyqtar salynyp, Semeıde Hılton, Redısson qonaqúıleri boı kótermek. Jeke kemeler toqtaıtyn arnaıy aılaqtar ashylady.
– 2025 jyly birinshi ret oblystyq bıýdjetten 1 mlrd teńge qarjy bóldik. Birinshi kezekte qoqys jáshikteri, sheshinetin oryndar, dárethana salý boıynsha, jaǵalaýlardy bekitýge baılanysty qarjy bólindi. Bıylǵy jyly 2,4 mlrd teńge qarjy bólinip otyr. Munyń barlyǵy Alakóldiń damýyna qajetti jobalardy júzege asyrýǵa baılanysty jumsalady, – dedi Abaı oblysy ákiminiń birinshi orynbasary Erbol Sadyr.
Otyrysqa toǵyz mınıstrliktiń, Abaı oblysy ákimdiginiń ókilderi, depýtattar, sarapshylar men kásipkerler qatysty. Qorytyndysynda barlyq usynystar júıelenip, Úkimetke joldanady.
Aıta keteıik, bıyl jazda Alakólge qosymsha 9 poıyz qatynaıdy.
Sondaı-aq Alakóldi damytýdyń bas jospary ázirlenip jatyr.
