Geosaıası teketirester álemdik ekonomıkaǵa aıtarlyqtaı zııanyn tıgizedi
ASTANA. KAZINFORM — Geosaıası teketirester álemdik ekonomıkaǵa aıtarlyqtaı zııanyn tıgizedi. Bul týraly elordada ótip jatqan ІІ Astana Think Tank Forum-2025 halyqaralyq forýmynda Syrtqy ister mınıstriniń birinshi orynbasary Erjan Ashyqbaev aıtty.
— Búginde barlyǵymyz qazirgi álem aıasyna toptasýdy talap etip otyrmyz. Bárimiz barlyq tarap arasyndaǵy baıypty, syndarly dıalog bolmaı jaqandyq turaqtylyq pen qaýipsizdikti qamtamasyz etý múmkin ekenin túsinemiz. Sanktsııalar, geosaıası teketirester álemdik derjavalarǵa ǵana emes, sonymen birge úshinshi elderge jáne jalpy álemdik ekonomıkaǵa aıtarlyqtaı zııanyn tıgizedi. Mundaı jaǵdaıda memleketter arasyndaǵy ózara túsinistik pen senimdi nyǵaıtý qajettiligi aıryqsha ózekti. Qazaqstan atalǵan syn-qaterlerdi sheshýdi tolyqtaı jaqtaıdy, — dedi Erjan Ashyqbaev.
Sonymen qatar ol transqurlyqtyq kólik baılanysyn nyǵaıtýda Ortalyq Azııanyń básekelestik basymdyǵy artyp kele jatqanyna toqtaldy.
— Transkaspıı halyqaralyq kólik baǵdary, «Bir beldeý, bir jol», Global Gateway bastamalaryna óńirdegi barlyq el men halyqaralyq seriktester qatysady. Osylaısha, kóliktik ózara baılanystyń arta túsýi Ortalyq Azııaǵa ekonomıkalyq serpilis berip qana qoımaı, jetkizilim tizbegi turaqtylyǵyn nyǵaıtý, jahandyq turaqtylyqty kúsheıtý men ózara senimdi arttyrý isine ujymdyq úlesin de kórsetip otyr. Ol Eýrazııadaǵy ózara tıimdi qarym-qatynas qurýdy odan ary damytýdaǵy, óńirlik jáne sheteldik oıynshylar arasynda múddeler sınergııasyn qalyptastyrýdaǵy paıymymyzdy kórsetedi, — dedi Syrtqy ister mınıstriniń birinshi orynbasary.
Aıta keteıik, forým barysynda Ortalyq Azııa saraptamalaryn álemdik zertteý qaýymdastyqtarmen biriktiretin platforma iske qosyldy.
QR Prezıdenti janyndaǵy Qazaqstannyń strategııalyq zertteýler ınstıtýty uıymdastyrǵan is-sharaǵa álemniń 20 elinen 40-qa jýyq sheteldik sarapshy, jetekshi «aqyl-oı ortalyqtarynyń» basshylary men zertteýshileri qatysyp jatyr. Forým aıasynda ótetin 9 taqyryptyq sessııada álemdik saıasat pen halyqaralyq qatynastardyń negizgi baǵyttary talqylanyp jatyr.