Georgıos Steırıs: Ál-Farabı - jahandaný ıdeıasyn birinshi bolyp alǵa tartqan adam

ALMATY. QazAqparat – Uly oıshyldyń fılosofııa tarıhyndaǵy orny erekshe. Ál– Farabı jahandanýdy oılaǵan sol ıdeıany alǵa tartqan birinshi adam. Bul týraly Grekııa memleketinen kelgen farabıtanýshy Georgıos Steırıs málim etti, dep habarlaıdy QazAqparat tilshisi.

Ál-Farabıdiń 1150 jyldyq mereıtoıynyń ashylý saltanatyna arnaıy kelgen Kapodıstrı atyndaǵy Afına ulttyq ýnıversıtetiniń professory, farabıtanýshy Georgıos Steırıstiń pikirinshe, Platon men Arıstotelden shabyt alǵan ál-Farabıdiń fılosofııalyq kózqarasy men tásili erekshe.

«Fılosofııa tarıhynda ál-Farabı ıdeıalary áli de ózekti. Onyń fılosofııasy Platon men Arıstotelden biraz shabyt alǵanymen, ol basqa álemdi beıneleýdiń mańyzdy jáne qyzyqty tásilderin óz kózqarasymen kórsetedi. Ol - jahandanýdy oılaǵan jáne sol ıdeıany alǵa tartqan birinshi adam. Ol ejelgi grekterdiń qaıyrymdy qala ıdeıasyn saqtaýǵa kómektesti. Onyń paıymdaýy kúni búginge deıin mańyzdy jáne yqpaldy bolyp qala bermek. Óıtkeni ál– Farabı eldi aqyl-oı men shydam arqyly basqarýǵa bolatynyn kezinde dáleldep ketken. Muny eshbir dinı nemese etnıkalyq dástúr joqqa shyǵarmaıdy»,– deıdi farabıtanýshy.

Onyń aıtýynsha, ál-Farabı shyǵarmashylyǵy álemdi biriktiredi.

«Uly oıshyldyń shyǵarmashylyǵy men qyzmeti Qazaqstan, Irak, Sırııa jáne Mysyrdyń tarıhı jerlerin, Jerorta teńizinen Qytaı shekarasyna deıingi barlyq uly órkenıetterdi biriktirdi. Nátıjesinde ol Arıstotelden keıingi uly fılosof atandy. Ál-Farabı - Islam men klassıkalyq grek fılosofııasynyń qıylysynda kóterilgen máselerdi birinshi bolyp zerttegen fılosof. Ol eki jaqty da damytatyn fılosofııalyq jáne dinı beıimdelýdiń úlgisin kórsete bildi»,– deıdi Kapodıstrı atyndaǵy Afına ulttyq ýnıversıtetiniń professory Georgıos Steırıs.

Búgin Qazaqstan ál-Farabıdiń 1150 jyldyǵyn merekeleýdi resmı túrde bastady.