"Geom" JShS jaqynda «Alla» atymen shyǵarǵan araqqa qatysty keshirim surady

QMDB málimetine qaraǵanda, Qazaqstan musylmandary dinı basqarmasynyń tóraǵasy, bas múftı, sheıh Ábsattar qajy Derbisáliniń atyna "Geom" JShS-nyń bas dırektory A.A. Googeniń qoly qoıylǵan resmı hat kelip tústi. Onda jýyrda ǵana bilmestikpen araqtyń qaǵazynda "Alla" dep jazylyp, shaıtan sýdyń satylymǵa shyǵyp ketkeni týraly aıtylǵan. Zaýyt basshysy Qazaqstan musylmandary aldynda keshirim surady.

Aıta keteıik, atalǵan másele boıynsha QMDB málimdeme jasaǵan bolatyn.

«Aqtóbe qalasyndaǵy araqty shyǵarýshy «Geom» seriktestiginiń basshylarynyń mundaı soraqy qatelikke qalaısha jol bergendigi bizge beımálim. Qazaqstan musylmandary dinı basqarmasynyń Aqtóbe oblystyq ókildigine zaýyt basshylary «Alla» atyn ádeıi jazbaǵandyqtaryn, arabsha sózdiń maǵynasyna mán bermegendikterin aıtyp aqtalýda. Olar bul qatelikteri úshin el aldynda keshirim suraıtynyn málimdedi. Mundaı aýyr qatelikke qandaı sebeppen jol berilse de biz ony aýyr aıyptaımyz. Aldaǵy ýaqytta osyndaı ospadarlyqqa jol berilmeýi tıis. Sondyqtan atalǵan mekeme basshylarynan jibergen qatelikteri úshin Qazaqstan musylmandary aldynda keshirim surap, Allanyń aty jazylǵan araqtyń satylymnan túgeldeı alyp tastaýyn talap etemiz», - delingen bolatyn málimdemede.