Geologter men ınvestorlarǵa arnalǵan qatty qazbalar atlasy jasalyp jatyr

NUR-SULTAN. QazAqparat – Q. Sátpaev atyndaǵy Geologııalyq ǵylymdar ınstıtýty geologter men ınvestorlarǵa arnalǵan qatty paıdaly qazbalardyń atlasyn jasap jatyr. QR Ekologııa, geologııa jáne tabıǵı resýrstar mınıstrligi Geologııa komıtetiniń tóraǵasy Talǵat Satıev osyndaı málimet aıtty, dep habarlaıdy QazAqparat tilshisi.

«Aldaǵy 5 jylda baǵdarlama boıynsha nysanaly qarjylandyrý arqyly tereńde jatqan obektilerdi barlaý, sonyń kómegimen jańa ken oryndaryn ashý josparlanǵan.

Bıyl osy tásilmen Sátpaev atyndaǵy Geologııalyq ǵylymdar ınstıtýty, Serikbaev atyndaǵy Shyǵys Qazaqstan tehnıkalyq ýnıversıteti men Ahmedsafın atyndaǵy Gıdrogeologııa jáne geoekologııa ınstıtýty 3 jobany júzege asyrady.

Sonymen qatar, Q. Sátpaev atyndaǵy Geologııalyq ǵylymdar ınstıtýty qatty paıdaly qazbalardyń atlasyn jasap jatyr. Bul atlas geologter men ınvestorlarǵa nusqaýlyq bolady», - dedi Talǵat Satıev ortalyq kommýnıkatsııalar qyzmetinde ótken brıfıngte.

Atalǵan sharada Qazaqstan geologtarynyń Kaspıı tabanynan 15 shaqyrymdyq uńǵyma burǵylaýdy josparlap otyrǵany aıtyldy.