Geologııalyq zertteýler ortalyǵyn qurý týraly memorandýmǵa qol qoıyldy
ASTANA. QazAqparat - QR IJTM «Qazgeologııa» AQ basqarma tóraǵasy Ǵalym Nurjanov jáne «Nazarbayev University Research and Innovation System» bas dırektory Qanat Baıǵarın Qazaqstannyń Geologııalyq zertteýler ortalyǵyn qurý týraly memorandýmǵa qol qoıdy.
Bul týraly IJTM aqparat basqarmasynan habarlady.
Bul joba Memleket basshysynyń elimizde geologııalyq klasterdi damytý týraly tapsyrmasyna sáıkes júzege asyrylyp jatyr.
Buryn habarlanǵandaı, «Nazarbaev Ýnıversıteti» janynda Innovatsııalyq-zııatkerlik klaster qurylýda, onyń negizgi bóligi ǵylymı park bolmaq. Óz kezeginde, Ǵylymı park geologııa, AKT, bıomedıtsına jáne t.b. salalardaǵy neshe túrli ǵylymı-tehnıkalyq klasterlerden turady.
Ǵylymı parktiń eń basty jobasy Geologııalyq klaster bolyp tabylady, ol ózinde Kolorado Taý isiniń mektebimen (Colorado School of Mines) birge Taý isiniń mektebin jáne Jer týraly ǵylymdar ınstıtýtyn, sondaı-aq QR IJTM «Qazgeologııa» ulttyq geologııalyq barlaý kompanııasy» AQ-men birge QR Geologııalyq zertteýler ortalyǵyn qamtıtyn bolady.
Búgin qol qoıylǵan Memorandýmnyń maqsaty - Qazaqstannyń jáne jaqyn ári alys shet elderiniń mıneraldyq jáne kómirsýtekti shıkizatynyń, qatty paıdaly qazbalardyń jáne jer asty sýlarynyń keshendi geologııalyq, geohımııalyq, mıneralogııalyq, tájirıbeli-ónerkásiptik, eksperımentaldy jáne ǵylymı-qoldanbaly zertteýlerin júzege asyrý úshin Geologııalyq zertteýler ortalyǵyn qurý aıasynda yntymaqtastyqty ornatý.
Vıtse-premer Áset Isekeshev Geologııalyq zertteýler ortalyǵyn qurý Qazaqstanda dúnıejúzilik deńgeıdegi ınfraqurylymdy, ǵylymı-zertteý zerthanalaryn jasaýǵa múmkindik beretinin atap ótti.
Bul, óz kezeginde, taldamalardy elimizde júrgizý esebinen geologııalyq materıaldardy óńdeýge bólinetin qarjy shyǵyndary men ýaqytty aıtarlyqtaı qysqartady.
Geologııalyq Zertteýler Ortalyǵy 4 bloktan turatyn bolady: ákimshilik-keńselik, zerthanalyq-taldaý, kern saqtaý qoımasy, sondaı-aq tájirıbeli-ónerkásiptik jáne eksperımentaldyq bloktar.
Memleket basshysynyń tapsyrmasy boıynsha qurylǵan «Qazgeologııa» ulttyq geologııalyq barlaý kompanııasy mıneraldyq-shıkizat bazasynyń ornyn tolyqtyrýǵa, Qazaqstan Respýblıkasynyń ekonomıkasyn ornyqty damytýǵa kómektesý úshin geologııalyq barlaýǵa ınvestıtsııalar men ınnovatsııalyq tehnologııalardy tartýǵa baǵyttalǵan.
