Geologııalyq uıymdar birlestiginiń prezıdenti geologtardyń bıylǵy josparlarymen bólisti

ASTANA. QazAqparat - Búgin Ortalyq kommýnıkatsııalar qyzmetinde ótken brıfıngte Ulttyq kásipkerler palatasynyń Ken-rýda jáne metallýrgııalyq ónerkásip komıtetiniń múshesi, «QR Memlekettik óndiristik geologııalyq uıymdary qaýymdastyǵy» zańdy tulǵalar birlestiginiń prezıdenti Serikbaı Hamza elimizdegi geologııalyq ahýal jáne geologııalyq uıymdardyń jumysymen tanystyrdy.

«Geologııalyq zertteýdi joǵary deńgeıge kóterý máselesin Elbasymyz 2011 jyly sáýir aıynda Astanada ótken aýqymdy keńeste aıtqan bolatyn. Sodan beri bul másele kún tártibinen túsken emes. Jýyrda ǵana bolǵan Úkimettiń keńeıtilgen otyrysynda da Nursultan Nazarbaev geologııa máselesin kóterdi», - dep atap ótti ol. S.Hamzanyń aıtýynsha, Elbasy udaıy basa nazar aýdaryp kele jatqandyqtan, geologııa qaýymdastyǵy da sońǵy kezderi birshama sharýalar atqardy. «Geologııalyq qaýymdastyq Ulttyq kásipkerler palatasynyń quramyna kirgeli, birqatar iri sharalar atqardy. Máselen, «Qazaqstannyń keıbir kendi óńirleri» dep atalatyn úlken semınar ótkizdi, sondaı-aq 52 ujymnan 151 maman qatysqan taǵy bir úlken jıyn byltyr Almaty qalasynda ótkizildi. Sonymen qatar bıyl naýryz aıynda ótken búkilálemdik geologtar sımpozıýmynda da Orta Azııadaǵy iri ken oryndarynyń zerttelý máselesi jan-jaqty talqylandy», - dedi S.Hamza. Birlestik basshysy sondaı-aq qaýymdastyqtyń geologııa salasyndaǵy bıylǵy josparlarymen de bólisti. «Bıyl Ulttyq palatanyń qoldaýymen Qaraǵandy qalasynda tamyz aıynyń aıaǵynda elimizdegi geologııalyq ujymdardyń bas geologtaryn jınap, tájirıbe almasýdy josparlap otyrmyz. Al qyrkúıek aıynda Astanada jas geologtardyń ǵylymı-praktıkalyq konferentsııasyn ótkizemiz», - dep atap ótti S.Hamza.