Geologııalyq zertteýge 240 mlrd teńge bólindi

ASTANA. KAZINFORM — Qazaqstanda memlekettik geologııalyq zertteý salasy jańa kezeńge aıaq basty. Elde aldaǵy úsh jylda jobalardy júzege asyrýǵa shamamen 240 mlrd teńge bólinýi josparlanyp otyr. Bul týraly Ortalyq kommýnıkatsııalar qyzmetinde ótken baspasóz konferentsııasynda QR ÓQM Geologııa komıteti tóraǵasynyń mindetin atqarýshy Qanat Erýbaev habarlady.

Onyń aıtýynsha, zańnamaǵa engizilgen ózgeristerge sáıkes, jer qoınaýyn paıdalaný quqyǵyna arnalǵan aýktsıondardan túsetin bonýs qarajatynyń 50%-y memlekettik geologııa men ınfraqurylymdy damytýǵa baǵyttalady.

— 2027 jyldyń naýryz–sáýirinde alǵashqy perspektıvaly ýchaskelerdi anyqtap, aýktsıonǵa shyǵarý josparlanyp otyr. Bul ınvestıtsııa aǵynyn arttyrady ári ekonomıkaǵa oń áser beredi, — dedi Qanat Erýbaev.

Onyń aıtýynsha, Astanada halyqaralyq standartqa saı akkredıttelgen zerthanalyq keshen qurylady. Keshende zamanaýı zerthanalar jáne úlgiler men derekterdi saqtaý qoımalary bolady.

Sondaı-aq 2026 jyldyń 2–3 sáýirinde Astanada alǵashqy Ortalyq Azııa geologııalyq forýmy ótedi. Forým kásibı qaýymdastyqty biriktirýge, jobalardy ǵylymı súıemeldeýge jáne memleketaralyq yntymaqtastyqty damytýǵa arnalǵan.

Aıta keteıik, jyl sońyna deıin geologııalyq materıaldar 100% tsıfrlandyrylady.