Geologııalyq derekterdiń 97 paıyzy tsıfrlandyryldy — Naǵaspaev
ASTANA. KAZINFORM — Geologııa salasyna qatysty 250 terabaıt arhıv deregi tsıfrlandyryldy. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.
— Geologııa salasynda arhıv derekterin elektrondyq formatqa kóshirý boıynsha aýqymdy jumys istelip jatyr. Búginde geologııalyq aqparattyń 97 paıyzdan astamy, ıaǵnı shamamen 250 terabaıt derek tsıfrlandyryldy. Jumysty jedeldetý úshin arhıv materıaldaryn avtomatty óńdep, geologııalyq modelder qalyptastyratyn jasandy ıntellekt júıesi ázirlendi, — dedi mınıstr.
Onyń aıtýynsha, tsıfrlanǵan derekter biryńǵaı Big Data júıesinde jınaqtalady. Qazir júıege 1 terabaıt derek jınaqtalyp, olar jasandy ıntellekt arqyly óńdelip, iriktelip jatyr.
— Jasandy ıntellekt koordınattardy anyqtap, mańyzdy derekterdi irikteıdi jáne júıeleý ýaqytyn qysqartyp, sheshim qabyldaý sapasyn arttyrady. Óńdelgen derekter negizinde jer qoınaýy kartasy ázirlendi. Júıe aqparatty yńǵaıly formatta fıltrleýge, taldaýǵa jáne perspektıvti ýchaskelerdi tez anyqtaýǵa múmkindik beredi. Mysaly, ekranda Ulytaý oblysynyń ınteraktıvti jer qoınaýy kartasynda jasandy ıntellekt mys áleýeti joǵary ýchaskelerdi avtomatty túrde anyqtap, kórsetken. Ár blokty detalızatsııalaý barysynda jekelegen ýchaskeler týraly keńeıtilgen málimetter, sonyń ishinde geologııalyq qabattyń derekterin alýǵa bolady. Osylaısha jasandy ıntellekt sheshim qabyldaýǵa qajetti derekterge jyldam qoljetkizýge múmkindik beredi, — dedi Ersaıyn Naǵaspaev.
Aıta keteıik, Úkimet otyrysynda ekonomıka salalaryna jasandy ıntellekt elementterin engizý jaıy talqylanyp jatyr.
