Geologııalyq barlaýǵa salynǵan ınvestıtsııa kólemi 433 mlrd teńgege jetti
ASTANA. KAZINFORM – Geologııalyq barlaýǵa salynǵan ınvestıtsııa kólemi 433 mlrd teńgege jetti. Bul týraly GECA 2026 halyqarlyq geologııalyq forýmda Energetıka vıtse-mınıstri Erlan Aqbarov aıtty.
- 2023 jyldan bastap geologııalyq barlaýǵa salynǵan ınvestıtsııa kólemi shamamen 433 mlrd teńgeni qurady. Al kómirsýtekterdi barlaý men óndirýge arnalǵan qoldanystaǵy kelisimsharttar sany 319-ǵa deıin ósti, - dedi vıtse-mınıstr.
Erlan Akbarov Memleket basshysynyń elimizdiń geologııalyq zerttelgen aýmaǵynyń aýdanyn 2026 jylǵa qaraı 1,5 mln-nan 2,2 mln-ǵa sharshy shaqyrymǵa deıin ulǵaıtý jónindegi tapsyrmalarynyń oryndalýyna erekshe nazar aýdardy. Bul maqsatqa qol jetkizý úshin 2022-2025 jyldar aralyǵynda zańnamaǵa tujyrymdamalyq túzetýler engizildi. Onyń ishinde «dástúrli emes kómirsýtekter» uǵymyn engizý, elektrondyq aýktsıondar rásimderin ońaılatý jáne kúrdeli jobalar úshin eleýli fıskaldyq preferentsııalar beretin Jaqsartylǵan modeldik kelisimshartty ázirleý jumystary atqaryldy.
- Jańa sharalar ákimshilik kedergilerdi azaıtýǵa múmkindik berdi. Endi ınvestorlardyń aýktsıondyq ótinimderdegi qatelerdi túzetýge quqyǵy bar jáne eger seısmıkalyq zertteýler burǵylaýdyń perspektıvasyz ekenin rastasa, ýchaskeni aıyppulsyz qaıtarý múmkindigi qarastyrylǵan. Bul jer qoınaýyn paıdalanýshylarǵa ár kezeńde 300 myń AQSh dollaryna deıin qarajat únemdeýge múmkindik beredi, - dedi ol.
Vıtse-mınıstr dereginshe, salany tsıfrlandyrý jáne ashyqtyqty arttyrý aıasynda 11 aýktsıon ótkizilip, nátıjesinde 55 mlrd teńge somasyna ınvestıtsııalyq mindettemeleri bar 121 ýchaske iske asyryldy.
Aıta keteıik, elimizde 4,7 mlrd tonnaǵa jýyq shartty otyny bar jerlerge geologııalyq barlaý jobasy jasalǵan.
