Geologııalyq barlaý jumystaryn júrgizýge 40,7 mlrd teńgeden astam qarajat bólinedi
ASTANA. KAZINFORM – Úkimet Memleket basshysynyń tapsyrmalary aıasynda geologııalyq barlaý salasyndaǵy 20 jobany qarjylandyrýdy maquldady. Bul týraly Úkimettiń baspasóz qyzmeti habarlady.
Prezıdenttiń jer qoınaýyn zerdeleý jáne elimizdiń mıneraldyq-shıkizat bazasyn tolyqtyrý jónindegi tapsyrmalaryn oryndaý sheńberinde Úkimet rezervinen 2026 jyly keshendi geologııalyq barlaý jumystaryn júrgizýge 40,7 mlrd teńgeden astam qarajat bólinedi. Tıisti qaýlyǵa Premer-mınıstr Oljas Bektenov qol qoıdy.
Qarajat 1:50 000 masshtabyndaǵy ekinshi býyndy (GS2-50) 20 geologııalyq túsirilim jobasyn júzege asyrýdy bastaýǵa baǵyttalady. Jumystar shamamen 100 myń sharshy shaqyrymdy qamtıdy, bir ýchaskeniń ortasha aýdany shamamen 5 myń sharshy shaqyrym.
GS2-50 baǵdarlamasy zamanaýı geofızıkalyq, qashyqtyqtan jáne geohımııalyq zertteý ádisterin, sondaı-aq derekterdi tereń tsıfrlyq óńdeýdi qoldanýdy qarastyrady. Bul ózekti geologııalyq kartalardy qalyptastyrýǵa jáne perspektıvaly ýchaskelerdi anyqtaýǵa múmkindik beredi.
Bıyl aerogeofızıkalyq jáne dalalyq jumystar, sonyń ishinde geohımııa, burǵylaý jáne aryqtar qazý josparlanǵan. Dala jumystary maýsymynyń qorytyndysy boıynsha synamalarǵa aldyn ala zerthanalyq taldaý júrgiziletin bolady.
Boljamdy resýrstardy naqtylaı otyryp, anyqtalǵan jáne buryn belgili ken aımaqtary men perspektıvaly alańdardy mamandandyrylǵan zertteýge, sondaı-aq boljamdy resýrstardy esepteı otyryp, ken alqaptaryn baǵalaýǵa erekshe nazar aýdarylady. Alynǵan nátıjeler egjeı-tegjeıli izdeý jáne barlaý jumystaryn júrgizýge negiz bolady.
️Geologııalyq túsirilim Aqmola, Aqtóbe, Almaty, Shyǵys Qazaqstan, Qaraǵandy, Qostanaı, Soltústik Qazaqstan, Mańǵystaý, Túrkistan oblystarynyń, sondaı-aq Abaı, Ulytaý oblystarynyń aýmaqtaryn qamtıdy.
Sondaı-aq Shý-Sarysý jáne Soltústik Torǵaı aýmaqtarynda zerttelmegen munaı-gaz perspektıvaly shógindi basseınderdiń 2D seısmıkalyq barlaý jumystarynyń 6 jobasyn júzege asyrý kózdelgen. Qazirgi ýaqytta olardyń geologııalyq zertteý deńgeıi kómirsýtekterdiń munaı-gazdyń jetkilikti mólsheri men resýrstyq áleýetin senimdi baǵalaýdy qamtamasyz etpeıdi. Seısmıkalyq barlaýdy júrgizý munaı men gaz ken oryndaryn lokalızatsııalaý úshin perspektıvaly qurylymdardy anyqtaýǵa, sondaı-aq olardyń áleýetti kólemin baǵalaýǵa múmkindik beredi.
Osy baǵyttaǵy jumystar — tabıǵı resýrstardy tıimdi paıdalaný, geologııalyq barlaý salasyn damytý jáne jer qoınaýyn ıgerýge ınvestıtsııalar tartý úshin negiz qalyptastyrý jónindegi memlekettik saıasattyń mańyzdy bóligi.
Barlyq jobalardy 2028 jyldyń sońyna deıin aıaqtaý josparlanýda. Jalpy, úsh jyldyq kezeńde memlekettik geologııalyq zertteýge shamamen 240 mlrd teńge nemese $500 mln qarastyrylǵan.
Osy is-sharalardy júzege asyrý el aýmaǵyn geologııalyq zerdeleý deńgeıin arttyrýǵa, odan ári zertteý úshin perspektıvaly ýchaskelerdi anyqtaýǵa jáne Qazaqstannyń mıneraldyq-shıkizat bazasyn tolyqtyrý úshin jaǵdaılar jasaýǵa múmkindik beredi.
Aıta ketelik Geologııalyq zertteýge 240 mlrd teńge bólinetini týraly jazǵan edik.