Geologııalyq barlaý jumystaryn qarjylandyrý 3 jylda 500 mln dollarǵa jetedi – Úkimet basshysy
ASTANA. KAZINFORM – Geologııalyq barlaý jumystaryn qarjylandyrý 3 jylda 500 mln dollarǵa jetedi. Bul týrady GECA 2026 halyqarlyq geologııalyq forýmynyń jalpy otyrysynda Premer-mınıstr Oljas Bektenov aıtty.
- Geologııalyq barlaý jumystaryn qarjylandyrýǵa da barynsha kóńil bólinýde. Ol 10 ese ulǵaıyp, aldaǵy úsh jylda shamamen 500 mln dollarǵa jetedi. Astanada zamanaýı Geologııalyq klaster qurylýda. Onyń aıasynda taldaý zerthanasy, mıneraldar men geologııalyq aqparat qorynyń qoımalary iske qosylýda. Klaster kadrlyq jáne tehnıkalyq resýrstardy biriktirip, zertteý jumystaryn jandandyratyn geologııalyq quzyrettilik ortalyǵyna aınalady, - dedi Úkimet basshysy.
Oljas Bektenov Qazaqstan Prezıdenti 2026 jyldy «Tsıfrlandyrý jáne jasandy ıntellekt jyly» dep jarııalanyn eske saldy.
- Bul bastamanyń geologııa salasy úshin de mańyzy óte zor. Úlken derekterdi taldaý men geofızıkalyq modeldeýge negizdelgen ozyq tehnologııalar geologııalyq barlaý isine jańa serpin bereıtini sózsiz. Nátıjesinde jumystyń tıimdiligi artyp, sheshim qabyldaý úshin qajetti ýaqyt pen resýrstar únemdeledi. Tsıfrlyq transformatsııa sheńberinde jumys isteı alatyn jańa býyn mamandaryn, ıaǵnı kásibı geologtar men ınjenerlerdi jáne taldaýshylardy daıarlap, qalyptastyrý isi de aıryqsha nazardy qajet etedi, - dedi Premer-mınıstr.
Aıta keteıik, keshe forýmnyń birinshi kúninde Energetıka vıtse-mınıstri Erlan Aqbarov elimizde geologııalyq barlaýǵa salynǵan ınvestıtsııa kólemi 433 mlrd teńgege jetkenin atap ótti.
