Geologııalyq aqparatty tsıfrlandyrý qarqyndy júrip jatyr

 ASTANA.KAZINFORM - 2025 jylǵy 1 qańtardaǵy jaǵdaı boıynsha barlyǵy 4 579 342 birlikten turatyn bastapqy geologııalyq aqparattyń 60%-y — 2 601 571 birligi tsıfrlandy. Bul týraly Geologııa komıtetiniń baspasóz qyzmeti habarlady. 

Bul baǵyttaǵy jumystar «Ulttyq geologııalyq qyzmet» AQ bekitken josparǵa saı júrgizilýde jáne tolyq tsıfrlandyrý 2028 jylǵy 1 qańtarda aıaqtalady.

Tsıfrlanǵa bastapqy geologııalyq aqparat qataryna aýmaqtyq qorlarda saqtalǵan qaǵaz qujattardyń skanerlengen nusqalary, sondaı-aq magnıttik lentalar men kartrıdjderden alynǵan seısmıkalyq derekter jatady. Bul — dalalyq jáne zerthanalyq geologııalyq barlaý jumystary barysynda tikeleı tirkelgen, baǵaly ári túpnusqa málimetter.

— Sonymen qatar elimizde ekinshi geologııalyq aqparatty júıeleý jáne tsıfrlandyrý da belsendi túrde júrgizilip jatyr. Búgingi tańda Respýblıkalyq jáne aýmaqtyq geologııalyq qorlarda saqtalǵan 74 452 eseptiń ishinen 66 180-i qurylymdalyp, tsıfrlyq formatqa kóshirildi. Bul jalpy kólemniń 89%-yn quraıdy. Atalǵan jumysqa esepterdiń qaǵaz nusqalaryn skanerleý, olardy biryńǵaı elektrondy qaltalar men faıl túrlerine qurylymdaý jáne naqty zerttelgen aýmaqtarǵa geografııalyq sáıkestendirý kiredi, — delingen habarlamada.

Atqarylyp jatqan bul jumystar geologııalyq málimetterge qoljetimdilikti jeńildetip qana qoımaı, jer qoınaýyn paıdalanýǵa qatysty jasandy ıntellekt pen zamanaýı analıtıkalyq quraldardy engizýge berik negiz qalaıdy. Bul — «aqyldy geologııany» damytýǵa jáne Qazaqstannyń mıneraldyq-shıkizat salasyna ınvestıtsııa tartýǵa baǵyttalǵan mańyzdy qadam.

Aıta ketelik Tsıfrlandyrý jahandyq dıplomatııaǵa qalaı áser etkeni týraly jazǵan edik.