Astanada Qarataı Turysovtyń 90 jyldyǵyna arnalǵan konferentsııa ótti
ASTANA. KAZINFORM – Kórnekti memleket jáne qoǵam qaıratkeri, táýelsiz Qazaqstannyń tuńǵysh týrızm, dene shynyqtyrý jáne sport mınıstri Qarataı Turysovty eske alý sharasy ótti. Kózi tiri bolǵanda qaıratker 90 jasqa tolar edi.
Bıyl Qarataı Turysulynyń mereıtoıy Parlamentte, Almatydaǵy Qanysh Sátbaev atyndaǵy Ulttyq tehnıkalyq ýnıversıtette jáne Jambyl oblysynda saltanatty túrde atalyp ótti.
− Qarataı Turysuly eńbek jolyn qarapaıym geologtan bastap, Qazaqstan Ortalyq partııa komıtetiniń hatshysy, Qazaq KSR ónerkásip jáne ken baqylaý jónindegi memlekettik komıtet tóraǵasy, respýblıkanyń kásipodaqtar komıtetiniń jáne KSRO kásipodaqtary Ortalyq Komıtetiniń hatshysy, QR premer-mınıstriniń orynbasary qyzmetterin abyroımen atqardy. Ol – táýelsiz Qazaq eliniń tuńǵysh Týrızm, dene shynyqtyrý jáne sport mınıstri bolǵan tarıhı tulǵa. Budan keıin QR Ortalyq saılaý komıssııasynyń jáne Parlament Májilisiniń Qarjy jáne bıýdjet komıtetiniń tóraǵasy boldy, − dedi Týrızm jáne sport mınıstriniń orynbasary Serik Jaraspaev Qazaqstan Jeńil atletıka sport kesheniniń konferentsııa zalynda.
Qarataı Turysov el tarıhynda tereń iz qaldyrdy, ulttyq ekonomıkanyń qalyptasýyna, memlekettik ınstıtýttardyń damýyna jáne Qazaqstan memleketiniń nyǵaıýyna eleýli úles qosty. Ásirese Qarataı Turysovtyń qaıratkerlik bolmysy egemendik jyldary jarqyraı kórindi.
Ol 1987 jyly BUU otyrysynda baıandama jasaǵan alǵashqy qazaqstandyq saıasatker boldy. Al 1992 jyly týrızm jáne sport mınıstrligin basqaryp, Barselonadaǵy Olımpıada oıyndarynda Táýelsiz Qazaqstan delegatsııasyn bastap bardy.
Memleket jáne qoǵam qaıratkeri Qýanysh Sultanuly Qarataı Turysovtyń ómirden ozǵanyna 20 jyl bolsa da, eli bir jyl da umytyp, eleýsiz qaldyrmaǵanyn atap ótti.
− Qanysh Sátpaevtan keıin Jezqazǵan qalasyn etikpen 3 myń shaqyrym kezip ótken ekinshi geolog bolý baqytyna ıe boldym deıtin. Shyn máninde solaı. Qarekeńniń eńbegin búkil Arqa jurty, Torǵaı dalasynyń halqy erekshe qadirleıtinine talaı kýá boldyq. Geologııadaǵy óte sapaly ári nátıjeli jumysy joǵary baǵalanyp, ol 29 jasynda óte jaýapty qyzmetke – qalalyq partııa komıtetiniń birinshi hatshysy bolyp saılandy. Odan Torǵaı oblystyq partııa komıtetiniń hatshysy, respýblıkalyq ónerkásipti baqylaý komıtetiniń tóraǵasy, Qazaqstan kásipodaqtar tóraǵasy boldy. Dinmuhammed Qonaev Qarekeńniń bilimi men biliktiligin joǵary baǵalaıtyn. Qarekeńniń esimi memorıaldy taqtalarǵa jazylyp, ár qalada kóshelerge, JOO kafedra-fakýltetterine berilip, ómir joly maqala-zertteýlerge arqaý bolyp júr. Memlekettik eńbegine Parlament jınalysy da arnaıy baǵyttaldy. Týǵan óńiri – Jambyl oblysynda kóptegen sharalar ult perzentin eske alýǵa arnaldy. Búgingi basqosýymyz da – sondaı ıgilikti sharalardyń kórinisi», - dedi Q. Sultanuly.
