Geologııa komıteti alaıaqtyq sıpattaǵy qońyraýlardan saqtanýǵa shaqyrdy
ASTANA. KAZINFORM — Geologııa komıteti men «Ulttyq geologııalyq qyzmet» AQ qyzmetkerlerine alaıaqtyq qońyraýlar týraly eskertý jasaldy, dep habarlaıdy komıtettiń baspasóz qyzmeti.
Geologııa komıtetinde jáne «Ulttyq geologııalyq qyzmet» AQ-da ózderin basshylyq quram nemese qurylymdyq bólimshe qyzmetkeri retinde tanystyratyn belgisiz adamdardan kúmándi telefon qońyraýlary tirkelip jatyr.
— Mundaı qońyraýlar barysynda qyzmettik máselelerge qatysty usynystar aıtylyp, nemese úshinshi tulǵalarǵa berýge bolmaıtyn aqparat suralýy múmkin. Osyǵan baılanysty mekeme qyzmetkerlerine saq bolý, alynǵan aqparatty mindetti túrde tekserý jáne resmı emes baılanys kezinde jeke derekterdi, sondaı-aq qarjylyq málimetterdi bermeý jóninde eskertý jasaldy. Mekeme basshylyǵy qaýipsizdik talaptaryn qatań saqtaýǵa shaqyrdy, — delingen habarlamada.
Buǵan deıin habarlanǵandaı, Ulttyq bank alaıaqtyqty erte anyqtaý úshin jasandy ıntellektini engizip jatyr.
