Geologııa ekonomıkanyń tolyqqandy salasy bolýy kerek -Á.Isekeshov
TANA. 5 qazan. QazAqparat /Aıdar Ospanalıev/ - «Geologııaǵa ekonomıkanyń tolyqqandy salasy retinde qaraý kerek», deıdi Indýstrııa jáne jańa tehnologııalar mınıstri Áset Isekeshov. Bul pikirin ol búgin geologııa salasyn damytýǵa qatysty ótken dóńgelek ústel otyrysynda bildirdi.
Á.Isekeshovtyń aıtýynsha, geologtar bul máseleni osyǵan deıin de birneshe márte kótergenimen memleket geologııalyq barlaý jumystary men osy salaǵa ınvestıtsııa tartý máselesine jetkilikti deńgeıde kóńil bólmeı keldi. «Sondyqtan bul salaǵa qosymsha sala retinde emes, ekonomıkanyń tolyqqandy salasy retinde qaraý kerek degen oıdamyz. Sondyqtan biz qazir geologııa salasyn retteýge baǵyttalǵan zańnamalardy jetildirýge daıynbyz»,-dedi mınıstr.
Onyń pikirinshe, «Jer qoınaýy jáne jer qoınaýyn paıdalaný týraly» qoldanystaǵy zań men «Salyq týraly» zańǵa geologııalyq barlaý jumystaryn júrgizýge yqpal etetin ózgerister engizý kerek. «Osyndaı zańnamalyq qoldaý jer qoınaýyn paıdalanýshylar men ınvestorlardy barlaý jumystaryna tartyp, osy salada shaǵyn jáne orta bıznes nysandarynyń paıda bolýyna múmkindik beredi»,-dedi Á.Isekeshov.
