Geografııadan olımpıada jeńimpazdary marapattaldy

NUR-SULTAN. QazAqparat - Elordada «National Geographic Qazaqstan» jýrnaly men «Astana daryny» daryndylyqty damytý jáne psıhologııalyq súıemeldeý ortalyǵy 7-8 synyp oqýshylary arasynda geografııa páninen uıymdastyrǵan qalalyq I Ulttyq olımpıada óz máresine jetti, dep habarlaıdy QazAqparat.

Qaladaǵy №72 mektep-lıtseıde ótken olımpıadanyń alǵashqy mektepishilik kezeńine 98 mektepten 1373 oqýshy qatysyp, sonyń 291-i aýdandyq irikteýge ótse, solardyń arasynan úzdik shyqqan 102 oqýshy qorytyndy saıysta baq synady. Olarǵa geografııa páninen oqýshylardyń jas erekshelikterin eskere otyryp, jetekshi halyqaralyq olımpıadalardyń talaptaryna saı ázirlengen, sondaı-aq National Geographic jýrnalynyń materıaldary negizinde daıarlanǵan suraqtardy qamtıtyn tapsyrmalar usynyldy.

Mundaǵy maqsat oqýshylardyń geografııalyq bilimi men daǵdylarynyń sapasyna nazar aýdara otyryp, geografııalyq zertteýlerge umtylý belsendiligi men pándi tereńdetip oqýǵa degen qyzyǵýshylyǵyn arttyrýdy, halyqaralyq geografııa baıqaýlaryna mashyqtandyrýdy kózdedi.

Nátıjesinde, qalalyq qorytyndy kezeńniń jeńimpazdary men júldegerleri «Astana daryny» ortalyǵy men «National Geographic Qazaqstan» jýrnalynyń I, II jáne III dárejeli dıplomdarymen jáne gramotalarymen marapattaldy. Oqýshylarǵa sondaı-aq «National Geographic Qazaqstan» jýrnaly redaktsııasy daıyndaǵan arnaýly syılyqtar tapsyryldy.