Geografııa páni muǵalimderine arnalǵan elektrondyq oqý quraly ázirlendi

ASTANA. QazAqparat - Abaı atyndaǵy Qazaq ulttyq pedagogıkalyq ýnıversıtetiniń Laıshanov Shahıslam bastaǵan jas ǵalymdary men Jaratylystaný jáne geografııa ınstıtýtynyń professor-oqytýshylary geografııa páni muǵalimderine oqý-ádistemelik qoldaý kórsetý jáne olardyń geoaqparattyq bilimderin jetildirý maqsatynda «Geografııalyq bilim berýdegi geoaqparattyq tehnologııalar men resýrstar» elektrondyq oqý quralyn ázirledi.

Jańa oqý-quraldyń avtorlary: Laıshanov Shahıslam, Kaımýldınova Kúlásh, Alıaskarov Dýman, Ýsenov Nurbol jáne Isakov Erlan. Oqý quraly QR Ǵylym jáne joǵary bilim mınıstrliginiń Ǵylym komıteti qarjylandyratyn «Jańartylǵan mazmundaǵy geografııany oqytýda sandyq geoaqparattyq tehnologııalardy qoldanýdyń ádistemelik negizderin jasaý (joǵarǵy synyptardyń mysalynda)» ǵylymı joba aıasynda oryndalyp, Abaı atyndaǵy Qazaq ulttyq pedagogıkalyq ýnıversıtetiniń Ǵylymı keńesiniń maquldaýymen usynylyp otyr.

Oqyrmandar elektrondyq oqý quralymen arnaıy ashylǵan http://giseducation.kz saıty arqyly tanysyp, tegin júktep ala alady. Aldaǵy ýaqytta osy saıtqa joba aıasynda ázirlengen oqý-quraldary jarııalanyp, oqyrmandarǵa qoljetimdi etý kózdelgen.

Oqý-quraly arqyly geografııa muǵalimderi Jańartylǵan mazmundaǵy geografııany oqytýda qoldanýǵa bolatyn 60-tan astam geoaqparattyq tehnologııalarmen jáne resýrstar týraly aqparattarǵa ıe bolady. Olardy qoldanýdyń erekshelikteri men múmkindikterimen tanysyp, halyqaralyq jáne otandyq derekkózderden geografııalyq derekterdi alý, jáne olarmen jumys jasaýdy meńgeredi. Sonymen qatar, 9,10,11-synyptarǵa arnalǵan geografııa oqýlyqtarynda berilgen keıbir kúrdeli tapsyrmalardy oryndaýda geoaqparattyq resýrstardy qoldanýdyń ádistemelik nusqaýlyqtarymen tanysyp, olardy óz kásibı salalarynda qoldana alady. Oqyrmandarǵa yńǵaıly bolýy úshin oqý-quralynda geoaqparattyq tehnologııalar men resýrstarǵa siltemeler gıpersiltemeler jáne QR-kodtar arqyly berildi.